នៅទីក្រុងក្វាងចូវ ប្រទេសចិន ក្រុមហ៊ុន WeRide បានចាប់ដៃគូជាមួយក្រុមហ៊ុនផលិតរថយន្តឈានមុខគេ និងក្រុមហ៊ុនដឹកជញ្ជូន ដើម្បីបើកដំណើរការរថយន្តដឹកទំនិញបើកបរដោយខ្លួនឯង។ ភាពជាដៃគូយុទ្ធសាស្ត្ររវាងក្រុមហ៊ុន WeRide ក្រុមហ៊ុនផលិតរថយន្ត Jiangling Motors (JMC) និងក្រុមហ៊ុនដឹកជញ្ជូន ZTO Express មានគោលបំណងធ្វើពាណិជ្ជកម្ម និងផលិត “Robovan” សម្រាប់ការដឹកជញ្ជូនក្នុងទីក្រុង។
ក្រុមហ៊ុន Nissan ដែលជាក្រុមហ៊ុនគាំទ្រ WeRide ក៏បានបង្កើតប្រព័ន្ធបើកបរស្វ័យប្រវត្តិសម្រាប់រថយន្តផ្សេងៗទៀតផងដែរ។ ចាប់តាំងពីឆ្នាំ ២០១៩មក ក្រុមហ៊ុននេះបានធ្វើតេស្តមនុស្សយន្តស្វ័យប្រវត្តិ ឬកាប៊ីនស្វយ័តនៅតាមដងផ្លូវនៅទីក្រុងក្វាងចូវ ប្រទេសចិន ដែលជាទីស្នាក់ការកណ្តាលរបស់ក្រុមហ៊ុននេះ។ ក្រុមហ៊ុនបានបើកសេវាកម្មនេះដល់សាធារណៈជនកាលពីឆ្នាំមុន ដែលមាននៅក្នុងតំបន់បានកំណត់ក្នុងទីក្រុងប៉ុណ្ណោះ។
ក្រុមហ៊ុនមួយនេះក៏ធ្លាប់បានសាកល្បងរថយន្តក្រុងបើកបរដោយខ្លួនឯងដែល វាមានឈ្មោះថា Robobus។
លោក Tony Han នាយកប្រតិបត្តិក្រុមហ៊ុន WeRide បានប្រាប់ស្ថានីយទូរទស្សន៍ CNBC កាលពីថ្ងៃទី៩ ខែកញ្ញា ថា “យើងឃើញថាវាមានភាពខុសគ្នារវាងរថយន្តដឹកអ្នកដំណើរ និងរថយន្តដឹកជញ្ជូនក្នុងទីក្រុង ទោះវាជារថយន្តបើកបរស្វ័យប្រវត្តិដូចគ្នាក៏ដោយ តែប្រសិនបើអ្នកចុចកុងតាក់ដាក់កៅអីនៅទីនោះ វាអាចប្រើជារថយន្តតាក់ស៊ី (Robotaxi)។ បើអ្នកដកកៅអីចេញនោះវាពិតជារថយន្តដឹកទំនិញមួយ (Robovan)។”
“កម្មវិធីទាំងពីរនេះ (ជារថយន្តតាក់ស៊ីផង និងដឹកទំនិញដោយស័្វយប្រវត្តិផង) បានចែករំលែកដល់វិស័យបច្ចេកវិទ្យា ហើយក៏អាចរកបានប្រាក់ចំណូល និងប្រាក់ចំណេញដ៏ច្រើនគួរឱ្យកត់សម្គាល់” លោក Han បានលើកឡើង។ WeRide នឹងផ្តល់នូវប្រព័ន្ធបើកបរស្វ័យប្រវត្តិសម្រាប់ Robovan, JMC នឹងគ្រប់គ្រងការផលិត ខណៈ ZTO នឹងដាក់ពង្រាយយានយន្តសម្រាប់ប្រតិបត្តិការដឹកជញ្ជូនរបស់ពួកគេ។
លោក Han បាននិយាយថាក្រុមហ៊ុនទំនងជានឹងបង្កើតទីតាំងពីរ ឬបីកន្លែងដើម្បីធ្វើតេស្ត Robovan និងធ្វើឱ្យប្រសើរឡើងនូវដំណើរការរបស់យានយន្ត។ នៅពេលគម្រោងសាកល្បងទាំងនោះត្រូវបានបញ្ចប់ Robovan អាចនឹងត្រូវដាក់ឱ្យដំណើរការជាទ្រង់ទ្រាយធំ។ លោក Han បានបដិសេធមិនផ្តល់ពេលវេលាកំណត់ទេ ប៉ុន្តែគាត់បានរំពឹងថា “រថយន្តរាប់ម៉ឺនគ្រឿង” នឹងត្រូវបានដាក់ពង្រាយនាពេលអនាគត។
WeRide គឺជាផ្នែកមួយនៃការចាប់ផ្តើមការបើកបរស្វ័យប្រវត្តិរបស់ប្រទេសចិន ដែលមានតម្លៃប្រហែល ៣,៣ ពាន់លានដុល្លារ។ WeRide ក៏បានប្រកួតប្រជែងជាមួយក្រុមហ៊ុន រួមមាន Baidu និង Pony.ai ផងដែរ។ WeRide បានពង្រីកខ្លួនយ៉ាងឆាប់រហ័ស ហើយនៅដើមឆ្នាំនេះបានទិញក្រុមហ៊ុនដឹកទំនិញស្វយ័តមួយឈ្មោះ MoonX.AI ។ MoonX មានទំនាក់ទំនងរួចហើយជាមួយ ZTO Express មុនពេលទិញយក។
លោក Han បាននិយាយថា WeRide បានធ្វើការជាមួយ JMC លើគម្រោងស្រាវជ្រាវផ្នែកដឹកជញ្ជូនចាប់តាំងពីឆ្នាំ ២០១៩មកម្ល៉េះ។ នៅពេលដែល MoonX ត្រូវបានទិញដោយ WeRide ក្រុមហ៊ុនក៏មានគម្រោងទាក់ទងក្រុមហ៊ុន ZTO Express ធ្វើជាដៃគូផងដែរ។ គំរូអាជីវកម្មរបស់ WeRide នឹងចូលរួមនៅក្នុងប្រតិបត្តិការដឹកជញ្ជូនចុងក្រោយរបស់ក្រុមហ៊ុន ZTO។
លោក Han បានមានប្រសាសន៍ថា “ការធ្វើបែបនេះនឹងធ្វើឱ្យយើងអាចបង្កើនប្រាក់ចំណូលស្របពេលដែលយើង អាចទទួលបានមតិពីអតិថិជនដើម្បីកែលម្អផលិតផលរបស់យើងផងដែរ” ។
កង្វះបន្ទះឈីប
កង្វះខាតឧបករណ៍អេឡិចត្រូនិកសកលកំពុងជះឥទ្ធិពលដល់ឧស្សាហកម្មនានារួមទាំងក្រុមហ៊ុនផលិតរថយន្ត។ ប្រព័ន្ធបើកបរស្វយ័តរបស់ WeRide គឺពឹងផ្អែកលើបន្ទះឈីបផ្សេងៗ ដែលជាឧបករណ៍ជំនួយចាប់សញ្ញាដែលពាក់ព័ន្ធ។ លោក Han បាននិយាយថា វាអាចប៉ះពាល់ដល់ក្រុមហ៊ុននៅពេលដែលយើងចាប់ផ្តើមផលិតយានយន្តក្នុងទ្រង់ទ្រាយធំ។
លោក Han បានមានប្រសាសន៍ថា “ដោយសារយើងមានតម្រូវការលើឧបករណ៍ចាប់សញ្ញាច្រើន ដូចនេះខ្ញុំគិតថាកង្វះបន្ទះឈីបប្រភេទនេះអាចប៉ះពាល់ដល់ផែនការផលិតរបស់យើង” ។ លោកបាននិយាយថាកង្វះខាតបន្ទះឈីបនឹងមិនប៉ះពាល់ដល់គម្រោងបច្ចុប្បន្នជាមួយ JMC និង ZTO ទេ។ ប៉ុន្តែលោកបាននិយាយថា ប្រសិនបើក្រុមហ៊ុនត្រូវការផលិត Robovans ចំនួន ១០,០០០ ទៅ ៥០,០០០គ្រឿង បន្ទះឈីបអាចជាផ្នែកមួយនៃបញ្ហារបស់ក្រុមហ៊ុន។
លោក Han បានមានប្រសាសន៍ថា “យើងត្រូវមានផែនការការពារជាមុន ដើម្បីកុំឱ្យមានការរាំងស្ទះដល់សង្វាក់ផ្គត់ផ្គង់របស់យើង” ៕
អត្ថបទដកស្រង់ពី Arjun Kharpal
បកប្រែ និងកែសម្រួលដោយ កញ្ញា សូផាត