យោងតាមសារព័ត៌មាន INDEPENDENT ចុះផ្សាយថ្ងៃទី១១ ខែឧសភាបានអោយដឹងថា អតីតប្រធានាធិបតីរូបនេះបាននិយាយថា លោកពូទីនដែលពេញដោយកលល្បិចបានសាង "កំហុសយ៉ាងខ្លាំង" ជាមួយនឹងការលុកលុយដោយការបង្ហូរឈាម។ លោក Donald Trump បានបដិសេធមិននិយាយថាលោកគាំទ្រអ៊ុយក្រែនឱ្យឈ្នះសង្រ្គាមដែលបង្ហូរឈាមនេះជាមួយនឹងរុស្ស៊ីទេ ខណៈដែលលោកបានបង្ហាញខ្លួននៅលើការផ្សាយបន្តនៃកម្មវិធី CNN Town Hall។ ប្រធានាធិបតីមួយអាណត្តិរូបនេះត្រូវបានសួរម្តងហើយម្តងទៀតដោយពិធីករអ្នកស្រី Kaitlan Collins ថាតើលោកនឹងគាំទ្រនៅពីក្រោយអ៊ុយក្រែនដែររឺទេនៅក្នុងជម្លោះដែលរយៈពេល 15 ខែកន្លងមកហើយជាមួយនឹងកងកម្លាំងរបស់លោកវ្ល៉ាឌីមៀ ពូទីន ហើយលោកក៏បានគេចវេសពីសំណួរនេះម្តងហើយម្តងទៀត។ លោកបានប្រាប់អ្នកស្រី Collins នៅពេលដែលសួរអំពីការគាំទ្ររបស់លោកចំពោះអ៊ុយក្រែនថា"ខ្ញុំមិនគិតពីការឈ្នះ និងចាញ់ទេ ខ្ញុំគិតទាក់ទងនឹងការដោះស្រាយវា ដូច្នេះយើងនឹងឈប់សម្លាប់មនុស្សទាំងអស់នេះ ហើយនឹងលែងកំទេចប្រទេសនេះទៀតហើយ" ។ បន្ទាប់​មក​នាង​បាន​សួរ​លោក​ម្ដង​ទៀត​ថា​តើ​លោក​ចង់​ឱ្យ​អ៊ុយក្រែន ឬ​រុស្ស៊ី​ឈ្នះ​ជម្លោះនេះ។ លោកក៏បានតបវិញថា"ខ្ញុំចង់ឱ្យមនុស្សគ្រប់គ្នាលែងស្លាប់តទៅទៀត។ ពួកគេ​កំពុង​តែស្លាប់ ទាំងជនជាតិ​រុស្ស៊ី និង​អ៊ុយក្រែន។ ខ្ញុំ​ចង់​អោយពួកគេ​ឈប់​ស្លាប់»។ លោក Trump ក៏​បាន​អះអាង​ជា​ថ្មី​ម្តង​ទៀត​ថា លោកនឹង​ចំណាយ​ពេល​មួយ​ថ្ងៃក្នុង​ការិយាល័យ Oval Office ប៉ុណ្ណោះដើម្បី​បញ្ចប់​ជម្លោះនេះ។ លោកបាននិយាយថា"ខ្ញុំនឹងធ្វើវាត្រឹមរយៈពេល24ម៉ោងប៉ុណ្ណោះ អ្នកត្រូវការអំណាចជាប្រធានាធិបតីដើម្បីធ្វើវា។" ហើយលោកបានបន្ថែមថា: អ្នកដឹងទេ ខ្ញុំនឹងនិយាយរឿងនេះ ក៏ព្រោះតែខ្ញុំចង់ឱ្យអឺរ៉ុបដាក់ប្រាក់បន្ថែមទៀត។ ពួកគេគួរតែមានសមភាព ព្រោះពួកគេមានលុយច្រើន”។ បន្ទាប់មកអ្នកស្រី Collins បានសួរលោក Trump ថាតើលោកនៅតែមាន "ការគោរពយ៉ាងខ្លាំង" ចំពោះលោក Vladimir Putin ដូចដែលលោកបានអះអាងនៅពេលជាប្រធានាធិបតីដែរទេ។ “លោកបាន​ធ្វើ​ខុស​យ៉ាង​ខ្លាំង។ លោកជាមនុស្សឆ្លាត...គេចង់អោយអ្នកនិយាយថាគាត់ជាមនុស្សល្ងង់ មិនអីទេ គាត់មិនមែនជាមនុស្សល្ងង់ទេ គាត់ឆ្លាតណាស់ ហើយមានល្បិចកលទៀត ហើយលោកពូទីនបានសាងកំហុសយ៉ាងធ្ងន់ធ្ងរតាមគំនិតរបស់ខ្ញុំ។”