ព្រះរាជាណាចក្រកម្ពុជាតាមរយៈក្រសួងទេសចរណ៍បានជំរុញការផ្សព្វផ្សាយវិស័យទេសចរណ៍ និងការលក់កញ្ចប់ទស្សនកិច្ចសម្រាប់ទីផ្សារឥណ្ឌូនេស៊ី ទីផ្សារក្នុងតំបន់ និងពិភពលោកតាមរយៈពិព័រណ៍ TRAVEX 2023 នាឱកាសវេទិកាទេសចរណ៍អាស៊ានឆ្នាំ២០២៣នៅទីក្រុង Yogyakarta ប្រទេសឥណ្ឌូនេស៊ី។ លោក កាទើ មហាំម៉ាត់ ណោសស្រ៊ី អនុរដ្ឋលេខាធិការ និងជាតំណាងដ៏ខ្ពង់ខ្ពស់របស់លោក ថោង ខុន រដ្ឋមន្ត្រីនៃក្រសួងទេសចរណ៍កម្ពុជាបានដឹកនាំប្រតិភូក្រសួងទេសចរណ៍ និងក្រុមហ៊ុនឯកជនចំនួន៥ចូលរួមពិព័រណ៍ TRAVEX 2023 ក្នុងឱកាសវេទិកាទេសចរណ៍អាស៊ានឆ្នាំ២០២៣នៅទីក្រុង Yogyakarta ប្រទេសឥណ្ឌូនេស៊ី ដែលប្រព្រឹត្តទៅចាប់ពីថ្ងៃទី០៣ ដល់ថ្ងៃទី០៥ ខែកុម្ភៈ ឆ្នាំ២០២៣ ដើម្បីផ្សព្វផ្សាយសក្តានុពលវិស័យទេសចរណ៍កម្ពុជា និងជំរុញការលក់កញ្ចប់ទស្សនកិច្ចទេសចរណ៍ជាមួយប្រទេសឥណ្ឌូនេស៊ីប្រទេសក្នុងតំបន់ និងពិភពលោក។
ពិព័រណ៍ទេសចរណ៍ TRAVEX 2023 មានស្តង់សរុបប្រមាណ១០០ស្តង់អ្នកទិញសរុប៣៤២នាក់ និងអ្នកសារព័ត៌មានចំនួន៦០នាក់ក្នុងនោះក៏មានការចូលរួមពីសារព័ត៌មានអន្តរជាតិ CNN និង TTG ផងដែរ។ នៅពន្លាក្រសួងទេសចរណ៍កម្ពុជា មានរចនារូបភាពគោលដៅទេសចរណ៍ទាំង៤តំបន់យ៉ាងប្រណិតរួមជាមួយ ក្បាច់គុនល្បុក្កតោ និងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ផងដែរ។ ជាមួយគ្នានោះដែរលោក ហ៊ុល សីលា ទីប្រឹក្សានិងជាអគ្គនាយករងអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ, លោក វ៉េត យុវនាថ អគ្គនាយករងអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងលោក ប្រាក់ វុទ្ធី ប្រធាននាយកដ្ឋានសិក្សាទីផ្សារ និងផ្សព្វផ្សាយទេសចរណ៍ក្រៅប្រទេសបានអញ្ជើញចូលរួមកម្មវិធី Cambodia Media Briefing ដែលជាផ្នែកមួយនៃពិព័រណ៍ TRAVEX បានធ្វើបទបង្ហាញជូនអ្នកសារព័ត៌មានឥណ្ឌូនេស៊ី និងអន្តរជាតិអំពីបច្ចុប្បន្នភាពគោលនយោបាយទេសចរណ៍ គោលដៅទេសចរណ៍ និងផលិតផលទេសចរណ៍ថ្មីៗរបស់កម្ពុជាផងដែរ។
ក្នុងនោះអ្នកសារព័ត៌មានបានចាប់ អារម្មណ៍អំពីគោលដៅទេសចរណ៍កម្ពុជាក្នុងនោះក៏មានការចាប់អារម្មណ៍អំពី Halal Food នៅកម្ពុជានិងការទាក់ទាញទេសចរមូស្លីមមកកាន់គោលដៅទេសចរណ៍កម្ពុជាផងដែរ ។ ចំពោះសកម្មភាពនៅក្នុងពន្លាក្រសួងទេសចរណ៍មានការផ្តល់ជូននូវវត្ថុអនុស្សាវរីយ៍ក្រមាខ្មែរដំណាប់ផ្លែឈើខ្មែររបស់ក្រុមហ៊ុន Misota ឯកសារផ្សព្វផ្សាយ និង Pin Kingdom of Wonder, Feel the Warmth ការស្កេន QR Code វីដេអូ រូបភាព និងឯកសារផ្សព្វផ្សាយគោលដៅទេសចរណ៍តាមទូរស័ព្ទដៃ, ការចាក់វីដេអូនៅលើទូរទស្សន៍ និងការជម្រាបជូនអ្នកសារព័ត៌មានអ្នកទិញ និងអ្នកលក់មកពីបណ្តាប្រទេសនានាអំពីបច្ចុប្បន្នភាពនៃវិស័យទេសចរណ៍ “កម្ពុជាជាគោលដៅ សុវត្ថិភាព ស្អាត និងបៃតង” ផងដែរ។
ជាមួយគ្នានោះក៏បានចាក់ផ្សាយវីដេអូ “ឆ្នាំទស្សនាកម្ពុជា២០២៣”, “ព្រឹត្តិការណ៍អង្គរសង្ក្រាន្តចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣ នៅខេត្តសៀមរាប” និងព្រឹត្តិការណ៍កីឡាស៊ីហ្គេមលើកទី៣២ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ និងអាស៊ានប៉ារ៉ាហ្គេមលើកទី១២ចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ នៅរាជធានីភ្នំពេញវេទិកាទេសចរណ៍មេគង្គឆ្នាំ២០២៣ចាប់ពីថ្ងៃទី២៤ ដល់ថ្ងៃទី២៨ ខែមេសា ឆ្នាំ២០២៣ នៅខេត្តព្រះសីហនុ ដែលកម្ពុជានឹងធ្វើជាម្ចាស់ផ្ទះ វីដេអូ Taste Cambodia វីដេអូ NEXT Cambodia វីដេអូផ្សព្វផ្សាយរបស់ហ្វាមហៅស៍ រីស្សត និងស្ប៉ា សណ្ឋាគារ និងវីដេអូផ្សព្វផ្សាយរបស់រមណីយដ្ឋានសុខាផងដែរ។ តាមរយៈព្រឹត្តិការណ៍ពិព័រណ៍ TRAVEX 2023 កម្ពុជារំពឹងថា នឹងទទួលបានភ្ញៀវទេសចរឥណ្ឌូនេស៊ី និងអន្តរជាតិកាន់តែច្រើនឡើងនៅក្នុងឆ្នាំ២០២៣ និងនៅឆ្នាំបន្តបន្ទាប់ទៀត៕
