ពីមួយឆ្នាំទៅមួយឆ្នាំ ការផលិតឡានមានការកើនឡើងជាលំដាប់ ដើម្បីបំពេញទៅតាមតម្រូវការនិងចំនួនរបស់មនុស្សលោក ដែលកំពុងតែកើនឡើង ហើយឡានទាំងនោះមានទាំងថ្លៃបំផុត និងថោកបំផុត។ ឡានថ្លៃត្រូវបានគេផលិតឡើង មិនគ្រាន់តែសម្រាប់ជាមធ្យោបាយសម្រាប់ធ្វើដំណើរទេ តែវាក៏ជាការបង្ហាញឃើញពីភាពមានបាន និងទ្រព្យសម្បត្តិរបស់អ្នកជិះ ជាពិសេស វាធ្វើឲ្យអ្នកជិះ មានអារម្មណ៍រំភើប មោទកភាព និង High Show ផងដែរ។ ទោះបីជាយ៉ាងណាក៏ដោយ ឡានថ្លៃគឺដោយសារកត្តាមួយចំនួនដូចជា ម៉ាកយីហោ ការរចនាឡើងខុសប្លែកពីគេ គុណភាពនៃការបង្កើត ហើយនិងហេតុផលសម្រាប់ការចេញលក់របស់ពួកគេ។ ជាក់ស្តែងឡាន ទាំង១០ខាងក្រោម គឺសុទ្ធតែជាប្រភេទឡានដែលមានតម្លៃថ្លៃកប់ពពក ដូច្នេះអ្នកក្រៗដូចយើងមិនសាកសមនឹងជិះវាទេ ព្រោះអីយើងអត់មានលុយទិញ។
10. ប៊ុយហ្គាតទី ជីរុ៉ន សុបភើ ស្ពត 300 បូក - $4 លានដុល្លារ (Bugatti Chiron Super Sport 400+ - $4 million)
Bugatti Chiron Super Sport 300+ ជាប់ចំណាត់ថ្នាក់លេខ 10 ក្នុងបញ្ជីរថយន្តថ្លៃបំផុតទាំង ១០នៅលើពិភពលោក។ ម៉ូដែលនេះបង្ហាញឲ្យឃើញពីភាពល្អឥតខ្ចោះមួយផ្សេងទៀតនៃសិល្បៈហត្ថកម្មដ៏ប្រណិតរបស់យីហោ។ វាមានតម្លៃ ៤លានដុល្លារ និងផលិតតែ ៣០គ្រឿង ប៉ុណ្ណោះ។
9. លាំបូគីនី វីនីណូ រ៉ូដស្តឺ $4.5 (Lamborghini Veneno Roadster- $4.5 million)
វាត្រូវបានរចនាឡើងជាលក្ខណៈពិសេសសម្រាប់ការបើកបរ និងប្រកបដោយគុណភាពខ្ពស់។ វាមានល្បឿនលឿន គួរឲ្យទុកចិត្ត និងមានភាពសប្បាយរីករាយក្នុងការបើកបរ។ ពាក្យ Veneno ជាភាសាអេស្ប៉ាញ ហើយមានន័យថា ថ្នាំបំពុល។ វាត្រូវបានគេផលិតដំបូងតែបីគ្រឿងប៉ុណ្ណោះ។ វាមានតម្លៃ 4.5 លានដុល្លារ។
8. កូនីគសេគ ស៊ីស៊ីអេចអា ត្រេវីតា 4.8 លានដុល្លារ (Koenigsegg CCXR Trevita-$4.8million)
វាជារថយន្តជាប់កំណត់ត្រាខាងល្បឿនលឿនបំផុតមួយ ហើយវាត្រូវបានគេរចនាឡើងយ៉ាងអស្ចារ្យបំផុត ដោយតួវាមានសរសៃកាបូនដែលស្រោបដោយកំទេចពេជ្រ។ ដោយសារពិបាកផលិត គេផលិតបានតែពីរគ្រឿងប៉ុណ្ណោះ។ វាមានតម្លៃ ៤.៨ លានដុល្លារ។
7. ប៉ាហ្គានី ហួយរ៉ា អុីម៉ូឡា 5.4 លានដុល្លារ (Pagani Huayra Imola -$5.4 million)
Pagani Huayra Imola គឺជារថយន្តដែលមានតម្លៃថ្លៃបំផុតលំដាប់ទី៧ ក្នុងឆ្នាំ២០២២។ វាត្រូវបានប្រកាសនៅឆ្នាំ២០១៩ ជាមួយនឹងការផលិតមានកំណត់ត្រឹមតែប្រាំរថយន្តប៉ុណ្ណោះ។ វាមានតម្លៃ ៥.៤ លានដុល្លារ។
6. ប៊ុយហ្គាតទី ឌីវូ 5.8 លានដុល្លារ (Bugatti Divo -$5.8million)
Bugatti Divo ជារថយន្តស្ព័រម៉ាស៊ីនពាក់កណ្តាលផលិតដោយ Bugatti Automobiles SAS។ វាត្រូវបានបង្កើតឡើងជាមួយនឹងវិធីសាស្រ្តផ្តោតលើផ្លូវ។ វាត្រូវបានគេដាក់ឈ្មោះតាម Albert Divo ដែលជាកីឡាករបើកឡានប្រណាំងជនជាតិបារាំង។ វាមានភាពរហ័សរហួន និងស្វាហាប់បំផុត។ វាត្រូវបានគេផលិតតែ៤០គ្រឿងប៉ុណ្ណោះហើយ ត្រូវបានលក់អស់នៅថ្ងៃដំបូងនៃការដាក់លក់ ជាមួយនឹងតម្លៃ ៥.៨ លានដុល្លារ។
5. ម៉េកសេដេស ប៊ែនហ្ស៍ មេបែក អុិកសេឡេរូ៉ 8លានដុល្លារ (Mercedes Benz Maybach Exelero - $8 million)
វាជាប់ចំណាត់លេខប្រាំនៅក្នុងចំណោមរថយន្តថ្លៃបំផុតរបស់ពិភពលោក។ វាជារថយន្តស្ព័រ មានបួនកៅអី ហើយមានសមត្ថភាពខ្ពស់ និងមានរូបរាងប្លែក។ វាមានល្បឿនជាអតិបរមាគឺ ៣៤៣គីឡូម៉ែត្រក្នុងមួយម៉ោង និងមានតម្លៃ៨លានដុល្លារ ហើយតារារ៉េបដ៏ល្បីរបស់អាមេរិក Birdman បានទិញរថយន្តនេះ។
4. ប៊ុយហ្គាតទី សេនតូឌីស៊ី 9លានដុល្លារ (Bugatti Centodieci - $9 million)
វាជាប់ចំណាត់ថ្នាក់លេខរៀងទីបួន ហើយមានទម្ងន់ស្រាលជាង ប៊ុយហ្គាទី ជីរុ៉ន (Bugatti Chiron) ២០ គីឡូក្រាម ហើយវាមានម៉ាស៊ីន ៨០០០ cc quad-turbocharged W16 ដែលមានកម្លាំង ១៥៧៨ សេះ។ វាមានតម្លៃ ៩លានដុល្លារ។
3. ស្វេបថេល បាយ រ៉ូល រ៉យស៍ 13លានដុល្លារ (Sweptail by Rolls Royce – $13 million)
Sweptail by Rolls Royce ឬ Rolls Royce Sweptail ត្រូវបានរចនាឡើងទៅតាមការស្នើរសុំរបស់អតិថិជន ហើយបានក្លាយជារថយន្តថ្លៃជាងគេបំផុតរបស់ពិភពលោកដែលឈរនៅលេខរៀងទីបី ជាមួយនឹងតម្លៃ ១៣លានដុល្លារ។
2. ប៉ាហ្គានី ហ្សូនដា អេច ភី បាសេតតា - Pagani zonda hp barchetta (17លានដុល្លារ)
វាជាប់ចំណាត់លេខពីរជារថយន្តថ្លៃជាងគេបំផុតនៅក្នុងឆ្នាំ២០២២នេះ ជាមួយនឹងរូបរាងដ៏ប្រណិត ដែលមានកញ្ចក់តូចខុសប្លែកពីគេ ហើយកង់ខាងក្រោយត្រូវបានស្រោបដោយជាតិសរសៃកាបូន។ វាមានឥទ្ធិពល និងកម្លាំងខ្លាំងបំផុត ជាមួយនឹងតម្លៃ ១៧ លានដុល្លារ។
1. ប៊ុយហ្គាតទី ឡា វ័រទៀ ណ័រ 19 លានដុល្លារ (Bugatti La Voiture Noire – $19 million)
នេះម៉ូដែលរថយន្តដែលជាប់ក្នុងកំណត់ត្រារបស់មនុស្សជាតិ ជាមួយនឹងតម្លៃថ្លៃកប់ពពក ១៩លានដុល្លារ។ ឈ្មោះរបស់រថយន្តនេះជាភាសាបារាំង ដែលប្រែថា ឡានខ្មៅ ហើយមួយតួខ្លួនរបស់វាគឺខ្មៅទាំងអស់។ម៉ាស៊ីនរបស់វា អាចបង្កើតកម្លាំងបាន ១៥០០សេះ ហើយបើកបានលឿនលឿនបំផុត ៤៥០ គីឡូម៉ែត្រក្នុងមួយម៉ោង។ ចំណែកឯម្ចាស់របស់វាមានតែមួយគត់ គឺលោក ហ្វ៊ែរឌីណង់ ភីស (Ferdinand Piech) ដែលជាម្ចាស់ក្រុមហ៊ុន VW ៕
បកប្រែដោយ៖ ម៉ៅ គុយដង់