ភ្នំពេញ៖ សមាគមកម្មសិទ្ធិបញ្ញាកម្ពុជា (IPAC) គ្រោងនឹងរៀបចំកម្មវិធីប្រកួតប្រជែងដណ្តើមពានរង្វាន់ "សមាគមកម្មសិទ្ធិបញ្ញាកម្ពុជា សម្រាប់ការអភិវឌ្ឍវិស័យកម្មសិទ្ធិបញ្ញា" ឬ IPAC for IP Development Championship នាពេលឆាប់ៗខាងមុខនេះ។
កម្មវិធីនេះ ត្រូវបានផ្តួចផ្តើមឡើងដោយលោកស្រីប្រធានសមាគម ក្នុងគោលបំណងបំផុសគំនិតឲ្យមានការចូលរួមប្រកួតប្រជែងពីសំណាក់និស្សិត បុគ្គលិក និងម្ចាស់អាជីវកម្មនានា ដែលមានការពាក់ព័ន្ធនឹងការបង្កើតថ្មី ឬស្នាដៃទាំងឡាយដែលទាក់ទងទៅនឹងវិស័យកម្មសិទ្ធិបញ្ញា។
ការប្រកួតប្រជែងនេះ នឹងប្រព្រឹត្តទៅជា ២ដំណាក់កាល ដោយដំណាក់កាលទី១ តម្រូវឲ្យបេក្ខជនទាំងអស់ រៀបចំសសេរជាអត្ថបទស្រាវជ្រាវដែលពាក់ព័ន្ធនឹងគំនិត ឬស្នាដៃកម្មសិទ្ធិបញ្ញា ទៅតាមប្រធានបទដែលនឹងត្រូវផ្តល់ជូនដោយសមាគម។ ចំណែកឯដំណាក់កាលទី២ គឺសមាគម នឹងធ្វើការជ្រើសរើសបេក្ខជនឆ្នើមពីដំណាក់កាលទី១ ចំនួន៣រូប ដើម្បីការពារនូវស្នាដៃស្រាវជ្រាវរបស់បេក្ខជនទាំងនោះ នៅចំពោះមុខគណៈកម្មការ។
សម្រាប់ជ័យលាភីទាំង ៣រូប នឹងត្រូវទទួលបាននូវពានរង្វាន់អនុស្សាវរីយ៍ ជាមួយនឹងប្រាក់រង្វាន់ ព្រមទាំងទទួលបានការប្រគល់ពានរង្វាន់ជ័យលាភី នៅក្នុងកម្មវិធីចុះអនុស្សារណៈយោគយល់គ្នារវាង សមាគមកម្មសិទ្ធិបញ្ញាកម្ពុជា (IPAC) និង គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) ផងដែរ។
ដោយហេតុថា ការទទួលការចុះឈ្មោះ នឹងត្រូវបិទ ត្រឹមថ្ងៃទី១៤ ខែមករា ឆ្នាំ២០២២ ខាងមុខនេះហើយ ហេតុនេះសូមបេក្ខជនទាំងអស់ដែលមានការចាប់អារម្មណ៍ ចំពោះកម្មវិធីប្រកួតប្រជែងនេះ សូមរួសរាន់ដើម្បីដាក់ពាក្យសុំ មកកាន់សមាគមកម្មសិទ្ធិបញ្ញាកម្ពុជា តាមការណែនាំ ហើយក្រុមការងារសមាគមកម្មសិទ្ធិបញ្ញាកម្ពុជា នឹងផ្តល់ជូនបន្ថែមដល់បេក្ខជនដែលបានដាក់ពាក្យសុំចូលរួម នូវការណែនាំអំពីបែបបទ លក្ខខណ្ឌ និងនីតីវិធី នៃការប្រកួតប្រជែង តាមក្រោយ៕
