ភ្នំពេញ៖ មន្រ្តីជាន់ខ្ពស់ក្រសួងសុខាភិបាលបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ចំពោះជំងឺផ្ដាសាយបក្សី (វីរុសH5N1) ខណៈមេរោគនេះមានអត្រាមរណភាពខ្ពស់ជាងមេរោគកូវីដ-១៩។ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលបានមានប្រសាសន៍ថា ជំងឺផ្ដាសាយបក្សី (វីរុសH5N1) ពីសត្វបសុបក្សី មានអត្រាស្លាប់ខ្ពស់ជាងជំងឺកូវីដ-១៩ទៅទៀត។ លោកស្រីបានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នខ្ពស់ ចំពោះជំងឺផ្ដាសាយបក្សី និងមិនត្រូវទទួលទានសត្វបស្សីដែលឈឺ និងស្លាប់នោះទេប៉ុន្តែត្រូវយកសត្វដែលឈឺ និងស្លាប់ទៅដុត ឬកប់ចោលដើម្បីជៀសវាងការចម្លងផ្សេងៗ។

ជាមួយគ្នានេះ រដ្ឋលេខាធិការក្រសួងសុខាភិបាលបានណែនាំដល់ប្រជាពលរដ្ឋឱ្យប្រកាន់ភ្ជាប់នូវអនាម័យខ្ពស់ដោយលាងសម្អាតដៃ បរិស្ថាន និងការចម្អិនម្ហូបអាហារឱ្យបានត្រឹមត្រូវមិននឹងយកទៅបរិភោគ។ សូមបញ្ជាក់ថា គិតមកទល់ពេលនេះក្រសួងសុខាភិបាលបានរកឃើញការឆ្លងជំងឺផ្ដាសាយបក្សី (វីរុសH5N1) ចំនួន២ករណីក្នុងនោះមាន១ករណីបានបាត់បង់ជីវិត និង១ករណីទៀតកំពុងទទួលការព្យាបាលពីក្រុមគ្រូពេទ្យ៕