ភ្នំពេញ៖ ក្រសួងសុខាភិបាល បានរកឃើញមនុស្សចំនួន១២នាក់ បានប៉ះពាល់ជាមួយកុមារីកើតជំងឺផ្តាសាយបក្សី H5N1 នៅក្នុងខេត្តព្រៃវែង ក្នុងនោះមានអ្នកប៉ះពាល់ចំនួន៤នាក់បានចាប់ផ្តើមចេញរោគសញ្ញា។ រដ្ឋលេខាធិការក្រសួងសុខាភិបាលលោកស្រី យក់ សម្បត្តិ បានឱ្យថា មនុស្សចំនួន១២នាក់ត្រូវបានរកឃើញមានប៉ះពាល់ជាមួយកុមារីកើតជំងឺផ្តាសាយបក្សី H5N1 ខណៈអ្នកប៉ះពាល់ចំនួន៤នាក់ក្នុងចំណោមចំនួន១២នាក់កំពុងចាប់ផ្តើមចេញរោគសញ្ញា។

លោកស្រី យក់ សម្បត្តិ បានបញ្ជាក់ថា ក្រុមការងារជំនាញរបស់ក្រសួងសុខាភិបាលបានយកសំណាករបស់អ្នកសង្ស័យទៅវិភាគរោគនៅមន្ទីរពិសោធន៍ក្នុងរាជធានីភ្នំពេញ។ក្រសួងសុខាភិបាលបានប្រកាសថា កុមារីម្នាក់បានចាប់ផ្តើមឈឺកាលពីថ្ងៃទី១៦ ខែកុម្ភៈ ឆ្នាំ២០២៣ ដោយមានរោគសញ្ញាគ្រុនក្តៅ៣៩អង្សាសេ ព្រមទាំងមានក្អក ឈឺក។ក្រោយព្យាបាលនៅមូលដ្ឋានមិនធូរស្រាលដោយកុមារីចាប់ផ្តើមហត់ក៏បញ្ជូនព្យាបាលនៅមន្ទីរពេទ្យកុមារជាតិនៅភ្នំពេញ ។

លុះនៅថ្ងៃទី២១ ខែកុម្ភៈ  ឆ្នាំ២០២៣ គ្រូពេទ្យព្យាបាលបានយកវត្ថុផ្ញើមកវិទ្យាស្ថានជាតិសុខភាពសាធារណៈរួចទទួលលទ្ធផលថ្ងៃទី២២ ខែកុម្ភៈ ឆ្នាំ២០២៣ បញ្ជាក់មានវិជ្ជមាន មេរោគផ្តាសាយបក្សី H5N1 ចំណែកកុមារីបានបាត់បង់ជីវិត និងប្រគល់ជូនក្រុមគ្រួសារយកទៅធ្វើពិធីបុណ្យសពតាមប្រពៃណី។ ក្រសួងសុខាភិបាលបានអំពាវនាវដល់ប្រជាពលរដ្ឋកុំប៉ះពាល់សត្វឈឺ ឬងាប់ទាំងសត្វបក្សីស្រុក និងបក្សីព្រៃហើយក្នុងករណីសង្ស័យសូមពិគ្រោះជំងឺជាមួយគ្រូពេទ្យ៕