ភ្នំពេញ៖ ក្រសួងសុខាភិបាល បានរកឃើញមានករណីកើតជំងឺផ្តាសាយបក្សី H5N1 លើកុមារីម្នាក់ និងក្រោយមកបានបាត់បង់ជីវិតបន្ទាប់ពីក្រុមគ្រូពេទ្យខិតខំព្យាបាលអស់រយៈពេលជាច្រើនថ្ងៃរួចមក។ តាមការឱ្យដឹងពីនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានអះអាងថា កុមារី អាយុ ១១ឆ្នាំ ៦ខែ រស់នៅភូមិ រលាំង ឃុំ រំលេច ស្រុកស៊ីធរកណ្តាល ខេត្តព្រៃវែង ត្រូវបានរកឃើញមានកើតករណីជំងឺផ្តាសាយបក្សី H5N1។ ប្រភពដដែលបានបញ្ជាក់ថា កុមារីបានចាប់ផ្តើមឈឺនៅថ្ងៃទី១៦ ខែកុម្ភៈ ឆ្នាំ២០២៣ ដោយមានរោគសញ្ញាគ្រុនក្តៅ៣៩អង្សាសេ ព្រមទាំងមានក្អក ឈឺក។ក្រោយព្យាបាលនៅមូលដ្ឋានមិនធូរស្រាលដោយកុមារីចាប់ផ្តើមហត់ក៏បញ្ជូនព្យាបាលនៅមន្ទីរពេទ្យកុមារជាតិនៅភ្នំពេញ ។

នាយកដ្ឋានប្រយុទ្ធនឹងជំងឺឆ្លងបានឱ្យដឹងទៀតថា នៅថ្ងៃទី២១ ខែកុម្ភៈ  ឆ្នាំ២០២៣ គ្រូពេទ្យព្យាបាលបានយកវត្ថុផ្ញើមកវិទ្យាស្ថានជាតិ សុខភាពសាធារណ:  រួចទទួលលទ្ធផល ថ្ងៃទី២២ ខែកុម្ភ: ឆ្នាំ២០២៣ បញ្ជាក់មានវិជ្ជមានមេរោគផ្តាសាយបក្សី H5N1 ចំណែកកុមារីបានបាត់បង់ជីវិត និងប្រគល់ជូនក្រុមគ្រួសារយកទៅធ្វើពិធីបុណ្យសពតាមប្រពៃណី។ ជាមួយគ្នានេះនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានអំពាវនាវដល់ប្រជាពលរដ្ឋកុំប៉ះពាល់សត្វឈឺ ឬងាប់ទាំងសត្វបក្សីស្រុក និងបក្សីព្រៃ  ហើយក្នុងករណីសង្ស័យសូមពិគ្រោះជំងឺជាមួយគ្រូពេទ្យ ឬរាយការណ៍ទៅលេខ១១៥៕