1. ប្រធានាធិបតី Colombia បដិសេធក្នុងការផ្គត់ផ្គត់សព្វាវុធដល់អ៊ុយក្រែន
យោងតាមសារព័ត៌ Tass របស់រុស្ស៊ីចុះផ្សាយថ្ងៃទី២១ ខែមេសាបានអោយដឹងថាប្រធានាធិបតីរបស់ប្រទេសកូឡុំប៊ី លោក Gustavo Petro បាននិយាយថា ប្រទេសកូឡុំប៊ី នៅតែបដិសេធមិនផ្គត់ផ្គង់សព្វាវុធ និងឧបករណ៍យោធា ដែលជាចម្បងរួមមានឧទ្ធម្ភាគចក្រផលិតឡើងដោយរុស្ស៊ីទៅកាន់រដ្ឋាភិបាលទីក្រុងគៀវទេ។ លោកបានប្រាប់អ្នកយកព័ត៌មាន TASS បន្ទាប់ពីកិច្ចពិភាក្សាជាមួយប្រធានាធិបតីអាមេរិកលោក Joe Biden នៅសេតវិមានកាលពីថ្ងៃព្រហស្បតិ៍ថា "ជំហររបស់រដ្ឋាភិបាលបច្ចុប្បន្នគឺសព្វាវុធទាំងនេះគឺនឹងមិនត្រូវបានប្រើប្រាស់ក្នុងសង្រ្គាមទេ។ ពួកវានឹងមិនត្រូវបានបញ្ជូនទៅកាន់អ៊ុយក្រែនទេ ហើយក៏នឹងមិនត្រូវបានបញ្ជូនទៅកាន់រុស្ស៊ីដូចគ្នា"។ ការពិភាក្សាលើប្រធានបទបានវិលជុំវិញអំពី"អាវុធរុស្ស៊ី ដោយមុនគេបង្អស់នោះគឺជាឧទ្ធម្ភាគចក្រ" លោក Petro បានបន្តឡើង។ លោកបានបន្ថែមថា សព្វាវុធ និងឧបករណ៍យោធាទាំងនេះត្រូវបានទិញឡើងដោយរដ្ឋាភិបាលមុន។ មេដឹកនាំកូឡុំប៊ីរូបនេះបាននិយាយកាលពីខែមករាថា ទីក្រុងវ៉ាស៊ីនតោនបានពិភាក្សាអំពីការផ្ទេរអាវុធផលិតដោយរុស្ស៊ី និងសហភាពសូវៀតជាមួយនឹងទីក្រុងបូហ្គោតានៃប្រទេសកូឡុំប៊ី។ កាលពីពេលនោះ លោកបានមានប្រសាសន៍ថាសំណើរបស់សហរដ្ឋអាមេរិកមិនត្រូវបានពិចារណាឡើងដោយរដ្ឋាភិបាលនៃប្រទេសសាធារណរដ្ឋឡើយ។
2. សម្ព័ន្ធមិត្តណាតូយល់ព្រមអោយអ៊ុយក្រែននឹងក្លាយជាសមាជិក
យោងតាមសារព័ត៌មាន Sky News ចុះផ្សាយថ្ងៃទី២១ ខែមេសាបានអោយដឹងថាលោក Jens Stoltenberg អគ្គលេខាធិការ បាននិយាយថាសម្ព័ន្ធមិត្តណាតូទាំងអស់បានយល់ព្រមអនុញ្ញាតអោយ អ៊ុយក្រែននឹងក្លាយជាសមាជិក។ ថ្លែងនៅមុនកិច្ចប្រជុំនៃក្រុមទំនាក់ទំនងការពារជាតិអ៊ុយក្រែននៅឯមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់ លោកក៏បានប្រាប់អ្នកសារព័ត៌មានថា នៅពេលដែលសង្រ្គាមនៅអ៊ុយក្រែនបានបញ្ចប់ ទីក្រុង Kyiv ត្រូវតែមានសមត្ថភាពក្នុង "ការរារាំងដើម្បីទប់ស្កាត់ការវាយប្រហារជាថ្មី" ។ លោកបាននិយាយថាការផ្តោតសំខាន់នាពេលនេះគឺដើម្បីធានាថាប្រទេសនេះអាចយកឈ្នះទប់ទល់លើរុស្ស៊ីបាន។ វាបានកើតឡើងបន្ទាប់ពីលោក Stoltenberg កាលពីម្សិលមិញបានសន្យាបន្តការគាំទ្រដល់អ៊ុយក្រែនក្នុងអំឡុងពេលធ្វើដំណើរទស្សនកិច្ចលើកដំបូងរបស់លោកមកក្នុងទីក្រុង Kyiv ចាប់តាំងពីការឈ្លានពានរបស់រុស្ស៊ីកាលពីជាងមួយឆ្នាំមុន។ លោកបានប្រាប់សន្និសីទសារព័ត៌មានមួយថា "អនុញ្ញាតឱ្យខ្ញុំនិយាយអោយច្បាស់ កន្លែងត្រឹមត្រូវមួយរបស់អ៊ុយក្រែនគឺស្ថិតនៅក្នុងគ្រួសារ Euro-Atlantic" ។ «កន្លែងដែលត្រឹមត្រូវរបស់អ៊ុយក្រែនគឺស្ថិតនៅក្នុងអង្គការណាតូ»។ ទន្ទឹមនឹងនេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃព្រហស្បតិ៍ថា ការរារាំងអ៊ុយក្រែនក្នុងការចូលអង្គការ NATO នៅតែជាគោលដៅចម្បងមួយ ដែលទីក្រុងម៉ូស្គូហៅថាជា "ប្រតិបត្តិការយោធាពិសេស" របស់ខ្លួន។
3. រុស្ស៊ីវាយប្រហារទីក្រុងរបស់ខ្លួន Belgorod ដោយចៃដន្យបង្កមនុស្ស2នាក់រងរបួស
យោងតាមសារព័ត៌មាន The Guardian ចុះផ្សាយថ្ងៃទី២១ ខែមេសាកន្លងទៅនេះបានអោយដឹងថាទីភ្នាក់ងារសារព័ត៌មាន Tass បានដកស្រង់សំដីក្រសួងការពារជាតិរុស្ស៊ី ដោយបានលើកឡើងថា មានយន្តហោះចម្បាំងរុស្ស៊ីមួយគ្រឿង បានបាញ់ប្រហារដោយចៃដន្យទៅលើទីក្រុង Belgorod ដែលនៅក្បែរនឹងប្រទេសអ៊ុយក្រែន ហើយបានបណ្តាលឱ្យមានការផ្ទុះ និងខូចខាតអគារផងដែរ។ កាលពីល្ងាចថ្ងៃព្រហស្បតិ៍ អាជ្ញាធរមូលដ្ឋានបានរាយការណ៍ពីបន្ទុះដ៏ធំមួយក្នុងទីក្រុងដែលស្ថិតនៅកាត់ព្រំដែនពីប្រទេសអ៊ុយក្រែន។ អភិបាលក្នុងតំបន់បាននិយាយឡើងថា មានស្ត្រីពីរនាក់បានរងរបួស។ ក្រសួងការពារជាតិបាននិយាយថា "នៅពេលដែលយន្តហោះកងកម្លាំងអាកាស Sukhoi Su-34 កំពុងហោះហើរពីលើទីក្រុង Belgorod ក៏មានការបញ្ចេញគ្រាប់រំសេវអាកាសចរណ៍ដោយចៃដន្យ" នេះបើយោងតាមសារព័ត៌មាន Tass ។ អភិបាលតំបន់ Belgorod លោក Vyacheslav Gladkov បានប្រកាសព័ត៌មានអាសន្ននេះនៅលើTelegram ថាបន្ទុះនេះបានបង្កើតអោយមានរណ្ដៅមួយប្រវែង ២០ម៉ែត្រ នៅលើដងផ្លូវសំខាន់មួយ។ លោកបានបន្ថែមថា មានរថយន្ត៤គ្រឿង និងអគារអាផាតមិន៤ខ្នងបានរងការខូចខាតជាដំណំ។ ក្រសួងការពារជាតិមិនបានអោយដឹងថាតើអាវុធប្រភេទណាទេដែលមានជាប់ពាក់ព័ន្ធលើបន្ទុះមួយនេះ នេះបើយោងតាមសារព័ត៌មាន Reuters។ កត់សម្គាល់ផងដែរថាតំបន់ Belgorod គឺជាកន្លែងរបស់រុស្ស៊ីមួយដែលគោលដៅសំខាន់ៗដូចជាឃ្លាំងអាវុធ និងឥន្ធនៈត្រូវបានរងបន្ទុះបំផ្លិចបំផ្លាញជាច្រើនចាប់តាំងពីផ្តើមមានសង្គ្រាមនេះមក។
4. អតីតមន្រ្តីCIAថា Blinken បង្ខំអោយដាក់ឯកសារ"Hunter"ជា"ព័ត៌មានមិនពិតរបស់រុស្ស៊ី"
យោងតាមសារព័ត៌មានJust The News ចុះផ្សាយថ្ងៃទី២១ ខែមេសាបានអោយដឹងថា អតីតនាយកCIA ស្តីទីបានសារភាពចំពោះសភាថាលោកបានរៀបចំលិខិតដែលចោទប្រកាន់ក្លែងបន្លំថាឯកសារនៅក្នុង Laptop របស់លោក Hunter Biden ដែលជាកូនប្រុសរបស់លោកប្រធានាធិបតី Joe Biden គឺជាព័ត៌មានមិនពិតរបស់រុស្ស៊ីក្នុងចេតនាដើម្បីទាញពិន្ទុសន្លឹកឆ្នោតឡើងវិញសំរាប់ការបោះឆ្នោតឆ្នាំ 2020 ដើម្បីគាំទ្រលោកJoe Biden។ ដោយនៅក្នុងឯកសារនោះមានលាតត្រដាងនូវព័ត៌មានទិន្នន័យអំពើពុករលួយរបស់រដ្ឋាភិបាល Biden។ លោកក៏បានប្រាប់អោយដឹងថាលោកធ្វើដូច្នេះទៅតាមការបញ្ជារបស់រដ្ឋលេខាធិការបច្ចុប្បន្នគឺលោកAntony Blinken។ នេះបើយោងតាមលិខិតមួយដែលចេញផ្សាយកាលពីថ្ងៃព្រហស្បតិ៍ដោយប្រធានគណៈកម្មាធិការតុលាការសភា លោក Jim Jordan។ ការទទួលយកជាវិសាមញ្ញដោយមន្ត្រីស៊ើបការណ៍អាជីពលោក Michael J. Morell បានផ្តល់នូវភស្តុតាងគួរឱ្យភ្ញាក់ផ្អើលឡើងថា លិខិតដ៏ល្បីល្បាញទទួលបានពីមន្ត្រីសន្តិសុខទាំង51នាក់កាលពីខែតុលាឆ្នាំ2020នោះ គឺមិនមែនជាគំនិតផ្តួចផ្តើមពីសហគមន៍ក្នុងស៊ើបអង្កេតដោយផ្ទាល់ទេ ប៉ុន្តែជាល្បិចកខ្វក់ផ្នែកនយោបាយដែលមានប្រភពមកពីលោក Blinken និងយុទ្ធនាការរបស់លោក Biden ។
5. ឯកសារCIAទំលាយថាចិនបង្កើតអាវុធ Cyber ដើម្បីគ្រប់គ្រងលើផ្កាយរណបសត្រូវ
របាយការណ៍ស៊ើបការណ៍សម្ងាត់របស់អាមេរិកដែលបែកធ្លាយបានបង្ហាញថា ប្រទេសចិនកំពុងបង្កើតអាវុធ Cyber ដ៏ទំនើបដើម្បី "ដណ្តើមគ្រប់គ្រង" លើផ្កាយរណបរបស់សត្រូវ ហើយកំណត់អត្តសញ្ញាណពួកវាត្រឹមជាឧបករណ៍សំរាប់ការឃ្លាំមើល និងប្រមូលទិន្នន័យនៅក្នុងអំឡុងពេលសង្រ្គាមប៉ុណ្ណោះ។ ឯកសារត្រូវបានសម្គាល់ជា CIA ដែលបានចេញផ្សាយនៅឆ្នាំនេះបាននិយាយថា ការជំរុញរបស់ប្រទេសចិនក្នុងការអភិវឌ្ឍសមត្ថភាពគឺដើម្បី "បដិសេធ កេងប្រវ័ញ្ច ឬប្លន់" ពីផ្កាយរណបរបស់សត្រូវ ដែលគឺជាផ្នែកស្នូលនៃគោលដៅរបស់ខ្លួនក្នុងការគ្រប់គ្រងព័ត៌មាន ដោយទីក្រុងប៉េកាំងចាត់ទុកថាជា "ដែនប្រយុទ្ធនៃសង្រ្គាម" ដ៏សំខាន់។ ការលាតត្រដាងនេះគឺជាឯកសារចុងក្រោយបង្អស់ដែលបែកធ្លាយដោយឆ្មាំអាកាសអាមេរិកវ័យ21ឆ្នាំ។ ក្នុងចំណោមព័ត៌មានផ្សេងទៀត ឯកសារក៏បានបង្ហាញផងដែរថា ក្រុមទាហានប៉ារ៉ារុស្ស៊ីដ៏ល្បីល្បាញ Wagner គឺមិនបានទទួលជោគជ័យក្នុងការស្នើសុំអាវុធពីប្រទេសចិននៅឆ្នាំនេះទេ។ ការយល់ដឹងអំពីយុទ្ធសាស្ត្រសង្គ្រាមរបស់ទីក្រុងប៉េកាំងមួយនេះក៏បានធ្វើឡើងបន្ទាប់ពីរដ្ឋមន្ត្រីក្រសួងរតនាគារសហរដ្ឋអាមេរិកអ្នកស្រី Janet Yellen កាលពីម្សិលមិញបានថ្លែងសុន្ទរកថាព្រមានថាការផ្តាច់ខ្លួនរបស់អាមេរិចចេញពីប្រទេសចិននឹងក្លាយជា "មហន្តរាយ" និង "អស្ថិរភាពសម្រាប់ពិភពលោកទាំងមូល" ។
