រដ្ឋមន្ត្រីការបរទេសអាមេរិកលោក Antony Blinken បានព្រមានថាការមិនបញ្ឈប់សកម្មភាពរុស្ស៊ីនឹងជាសារទៅកាន់ប្រទេសឈ្លានពានដទៃទៀតនៅជុំវិញភពផែនដីថាប្រសិនបើពួកគេប្រព្រឹត្តសកម្មភាពស្រដៀងគ្នានឹងមិនទទួលផលវិបាកអ្វីនោះទេ។

លោក Blinken បាននិយាយនៅឯក្នុង Raisina Dialogue 2023 នៅទីក្រុងដេលីក្រោមប្រធានបទ "The Quad Squad :ថាមពល និងគោលបំណងនៃពហុកោណ" ដែលជាកន្លែងដែលសមភាគីជប៉ុន អូស្ត្រាលី និងឥណ្ឌាក៏មានវត្តមាននៅទីនោះផងដែរ។

លោក Blinken បាននិយាយថា "យើងកំពុងផ្តោតយ៉ាងសំខាន់ទៅលើអ្វីដែលកំពុងកើតឡើងនៅប្រទេសអ៊ុយក្រែន ដែលកើតចេញពីការឈ្លានពានរបស់រុស្ស៊ីនេះមិនមែនដោយសារតែវាមានសារៈសំខាន់ចំពោះប្រជាជនអ៊ុយក្រែន រឺចំពោះអ៊ុយក្រែន និងអឺរ៉ុបប៉ុណ្ណោះទេ ប៉ុន្តែគឺដោយសារតែវាមានសារៈសំខាន់សំរាប់ពិភពលោកទាំងមូល" ។

រដ្ឋមន្ត្រីការបរទេសអាមេរិកបានបន្ថែមថា"ប្រសិនបើយើងអនុញ្ញាតឱ្យរុស្ស៊ីធ្វើអ្វីដែលខ្លួនកំពុងធ្វើនៅអ៊ុយក្រែននោះជាសារមួយទៅកាន់អ្នកឈ្លានពានគ្រប់ទីកន្លែងថាពួកគេក៏អាចនឹងរួចខ្លួនពីបញ្ហាទាំងនេះដែរ" ។

សង្រ្គាមនៅអ៊ុយក្រែនត្រូវបានពិភាក្សាយ៉ាងទូលំទូលាយក្នុងអំឡុងពេលព្រឹត្តិការណ៍ G20 ហើយវាត្រូវបានលើកឡើងនៅក្នុងកិច្ចប្រជុំថ្មីៗរបស់រដ្ឋមន្ត្រីការបរទេសនៅទីក្រុងញូវដែលី ផងដែរ ហើយក៏ត្រូវបានពិភាក្សានៅពេលដែលរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាលបានជួបគ្នានៅ Bengaluru ។

Blinken ក៏បាននិយាយផងដែរអំពីបញ្ហាសង្គ្រាមនៅអ៊ុយក្រែននេះជាមួយរដ្ឋមន្ត្រីសហភាពសម្រាប់កិច្ចការខាងក្រៅលោក S Jaishankar។ មេដឹកនាំទាំងពីរបានពិភាក្សាគ្នាអំពីមធ្យោបាយកាត់បន្ថយផលប៉ះពាល់នៃសង្គ្រាមនេះមកលើសេដ្ឋកិច្ចពិភពលោក និងខ្សែសង្វាក់ផ្គត់ផ្គង់ពិភពលោក។

លោកក៏បានជ្រើសរើសផ្ញើសារទៅកាន់សមភាគីរុស្ស៊ីរបស់លោកគឺលោក Sergey Lavrov ដោយបានជំរុញឱ្យផ្លាស់ប្តូរ "ការសម្រេចចិត្តដែលមិនអាចកែប្រែវិញបាន" របស់ទីក្រុងម៉ូស្គូ ហើយត្រលប់ទៅរកការអនុវត្តសន្ធិសញ្ញាកាត់បន្ថយអាវុធនុយក្លេអ៊ែរ The New START វិញដែលជាសន្ធិសញ្ញាកាត់បន្ថយអាវុធយុទ្ធសាស្ត្រ។

ក្នុងអំឡុងពេលប្រជុំដែលរៀបចំដោយ ORF លោក Blinken បាននិយាយថា Quad មិនមែនជាសម្ព័ន្ធមិត្តយោធាទេ ប៉ុន្តែជាក្រុមនៃប្រជាជាតិដែលចង់អភិវឌ្ឍ និងភ្ជាប់អ្នកពាក់ព័ន្ធទាំងអស់នៅក្នុងតំបន់ឥណ្ឌូប៉ាស៊ីហ្វិក។

លោក Blinken បាននិយាយថា"សម្រាប់យើងនាពេលអនាគតនឹងស្ថិតនៅច្រើននៅក្នុងឥណ្ឌូប៉ាស៊ីហ្វិក...សំណើរបស់យើងគឺផ្តល់ជម្រើសវិជ្ជមានអោយធ្វើការរួមគ្នាក្នុងភាពជាក់ស្តែងជាមួយបណ្តាប្រទេសក្នុងតំបន់តាមរយៈក្របខ័ណ្ឌផ្សេងៗគ្នា" ។

លោកបានបន្ថែមថា "ថាមពលដ៏អស្ចារ្យរបស់ Quad គឺជាការប្រមូលផ្តុំប្រទេសដែលមានគំនិតដូចគ្នា និងមានតម្លៃរួម។ យើងកំពុងបង្កើតជម្រើសវិជ្ជមានសម្រាប់ក្នុងតំបន់ ដែលមានដូចជា វ៉ាក់សាំង ជំនួយមនុស្សធម៌ និងការយល់ដឹងអំពីដែនសមុទ្រ" ។