យោងតាមសារព័ត៌មាន RT រុស្ស៊ី ចុះផ្សាយថ្ងៃទី១១ ខែឧសភាបានអោយដឹងថា ប្រធានាធិបតី​អាមេរិក​បាន​ជំរុញ​អ្នកគាំទ្រ​ឲ្យ​បរិច្ចាគ​ដល់​យុទ្ធនាការ​បោះឆ្នោត​ឡើងវិញ​របស់លោក លុះត្រាតែ​ពួកគេ​នៅតែចង់បាន​រយៈពេល៤ឆ្នាំដឹកនាំដោយគូប្រជែង​របស់លោកកាលពីឆ្នាំ ២០២០ ម្តងទៀត។ ប្រធានាធិបតីអាមេរិកលោក Joe Biden បានប្រើប្រាស់ Twitter ដើម្បីសុំឱ្យអ្នកគាំទ្ររបស់លោករកប្រាក់សម្រាប់យុទ្ធនាការឃោសនាបោះឆ្នោត លុះត្រាតែពួកគេនៅតែចង់ឱ្យលោក Donald Trump គ្រប់គ្រងដឹកនាំប្រទេសក្នុងរយៈពេល 4 ឆ្នាំខាងមុខទៀត។ ឱសានវាទរបស់ប្រធានាធិបតីបានធ្វើឡើងជាការឆ្លើយតបទៅនឹងការបង្ហាញខ្លួនរបស់លោក Trump នៅក្នុងកម្មវិធី CNN Town Hall មួយដែលរៀបចំដោយ CNN កាលពីថ្ងៃពុធនៅពេលដែលលោកបានព្យាយាមទាញធ្វើជាករណីសំរាប់ការឡើងធ្វើប្រធានាធិបតីរបស់លោក។ លោក Biden បានសរសេរឡើងបន្ទាប់ពីបទសម្ភាសន៍របស់លោក Trump នៅលើទូរទស្សន៍ដោយបានភ្ជាប់ជាមួយទំព័របរិច្ចាគយុទ្ធនាការ ActBlue Joe Biden និង Kamala Harris ដែលជាកន្លែងដែលមនុស្សត្រូវបានស្នើសុំឱ្យបរិច្ចាគអ្វីមួយពី $10 ទៅ $2,000ថា“វាងាយយល់ទេ អ្នកទាំងអស់គ្នា។ តើអ្នកពិតជាចង់បានរយៈពេលបួនឆ្នាំរស់នៅបែបនេះទៀតទេ?”។ ដូចដែលបានរាយការណ៍ដោយសារព័ត៌មាន The Hill បន្ទាប់ពីកម្មវិធី Town Hall របស់លោក Trump រួចមក យុទ្ធនាការរបស់លោក Biden ក៏បានផ្ញើអ៊ីមែលទៅកាន់ Subscriber របស់ខ្លួនដើម្បីស្វែងរកថវិការៃអង្គាសជាមួយនឹងប្រធានបទថា"ដូចនេះ វាពិតជាបានកើតឡើង" ។ អ៊ីមែល​ត្រូវបាន​រាយការណ៍​លើកឡើងថា "ប្រសិនបើអ្នកខកខានទស្សនាកម្មវិធី CNN Town Hall របស់លោក Trump អ្នកគួរតែសាកទៅទស្សនាវា។ ប៉ុន្តែ​ជម្រើស​គឺ​ច្បាស់លាស់ណាស់៖ តើអ្នកជ្រើសរើសយករយៈពេលបួន​ឆ្នាំ​ទៀត​ដែលមានលោក Trump ឬ​បួន​ឆ្នាំ​ទៀត​ដែលមានលោក Biden”។ កាល​ពី​ថ្ងៃ​ពុធ អតីត​ប្រធានាធិបតីលោក Donald Trump បាន​អង្គុយ​ផ្តល់បទសម្ភាសន៍នៅ​ក្នុង​កម្មវិធី Town Hall ​មួយ​ជាមួយនឹងអ្នកស្រី​ Kaitlan Collins របស់ CNN។ លោក​បាន​លើក​ឡើង​លើ​ប្រធាន​បទ​មួយ​ចំនួន​រួម​មាន​ទាំងការ​ក្លែង​បន្លំ​ការ​បោះ​ឆ្នោត ការ​បះបោរ​នៅ​វិមាន​កាពីតូល​ថ្ងៃ​ទី​៦ ខែ​មករា ជម្លោះ​អ៊ុយក្រែន និង​បំណុល​អាមេរិក។ បច្ចុប្បន្នលោក Trump ត្រូវបានគេចាត់ទុកថាជាគូប្រជែងមកពីគណបក្សសាធារណរដ្ឋដែលអាចទំនងជាងគេបំផុតក្នុងការដណ្តើមតំណែងប្រធានាធិបតីនៅក្នុងការបោះឆ្នោតឆ្នាំ 2024 ខាងមុខនេះ។ យោងតាមការស្ទង់មតិរបស់ Washington Post/ABC News ដែលបានចេញផ្សាយកាលពីថ្ងៃអាទិត្យ លោក Trump មាន 6 ពិន្ទុនាំមុខលោក Biden ក្នុងការប្រជែងគ្នាជាប្រធានាធិបតី ខណៈដែលការវាយតម្លៃការអនុម័តលើប្រធានាធិបតីដែលកំពុងកាន់អំណាចបានធ្លាក់ចុះដល់កម្រិតទាបថ្មីមួយ។ ការស្ទង់មតិបានណែនាំថាការវាយតម្លៃការការអនុម័តលើលោក Biden បានធ្លាក់ចុះមកត្រឹម 36% ខណៈដែលមានការធ្លាក់ចុះពី 42% នៅក្នុងខែកុម្ភៈ។ ក្នុង​ចំណោម​អ្នក​ដែល​មាន​អាយុ​ក្រោម 30 ឆ្នាំ អ្នកអនុម័តលើលោកកាន់តែ​មាន​កម្រិត​ទាប​ជាង ​គឺមក​ត្រឹមតែ 26%ប៉ុណ្ណោះ។ នោះក៏មានចំណែកមួយមកពីបញ្ហាសុខភាពផ្លូវចិត្ត និងផ្លូវកាយរបស់លោកប្រធានាធិបតីផងដែរ ដែលចោទជាកង្វល់ដល់អ្នកគាំទ្រ។