1. កាណាដា​ព្យាយាម​ចូលរួម​ជាមួយ​ប្លុក AUKUS ប្រឆាំង​ចិន

យោងតាមសារព័ត៌មាន RT ចុះផ្សាយថ្ងៃទី៩ ខែឧសភាបានអោយដឹងថាប្រមុខយោធាកាណាដាបាននិយាយថា ទីក្រុងអូតាវ៉ាមាន "ចំណាប់អារម្មណ៍ខ្ពស់" ក្នុងការជំរុញ "ទំនាក់ទំនងការពារ" របស់ខ្លួនជាមួយដៃគូក្នុងតំបន់។ សារព័ត៌មាន Globe and Mail បានរាយការណ៍ថាប្រទេសកាណាដា សង្ឃឹមថានឹងចូលរួមជាមួយប្លុកយោធា AUKUS ដឹកនាំដោយសហរដ្ឋអាមេរិក រួមជាមួយប្រទេសអូស្ត្រាលី និងចក្រភពអង់គ្លេសដោយកត់សម្គាល់ថារដ្ឋាភិបាលចង់ចូលរួមក្នុងទិដ្ឋភាពដែលមិនមាននុយក្លេអ៊ែរនៃកិច្ចព្រមព្រៀងឆ្នាំ 2021 ដែលបង្កើតឡើងដើម្បីប្រឆាំងនឹងទីក្រុងប៉េកាំង។ ទោះបីជានាយករដ្ឋមន្ត្រីលោក Justin Trudeau ធ្លាប់បានស្នើថាទីក្រុង Ottawa មិនមានចំណាប់អារម្មណ៍លើកតិកាសញ្ញាសន្តិសុខទេ ដែលត្រូវបានកំណត់ថានឹងផ្តល់ឱ្យទីក្រុង Canberra ជាមួយនឹងបច្ចេកវិទ្យានុយក្លេអ៊ែររបស់សហរដ្ឋអាមេរិកក៏ដោយ ចាប់តាំងពីពេលនោះមក ប្រទេសកាណាដាបានផ្លាស់ប្តូរទិសដៅ ហើយឥឡូវនេះកំពុងស្វែងរកការចូលរួមមួយនេះ នេះយោងទៅតាមមន្ត្រីមិនបញ្ចេញឈ្មោះពីររូបបានប្រាប់អ្នកសារព័ត៌មានកាលពីថ្ងៃចន្ទ។ សារព័ត៌មានបានរាយការណ៍ថា"ហេតុផលរបស់កាណាដាសម្រាប់ការចង់ចូលរួមនៅពេលនេះគឺមិនមែនដើម្បីទទួលបាននាវាមុជទឹកដើរដោយថាមពលនុយក្លេអ៊ែរដូចអូស្ត្រាលីនោះទេ ប៉ុន្តែជាការចូលរួមដោយគាំទ្រនូវសសរស្តម្ភទីពីរនៃកិច្ចព្រមព្រៀង AUKUS" ។ នោះនឹងរួមបញ្ចូល "ការចែករំលែកព័ត៌មាន និងកិច្ចសហប្រតិបត្តិការយ៉ាងជិតស្និទ្ធលើការពន្លឿនការអភិវឌ្ឍន៍នៃបច្ចេកវិទ្យាទំនើបៗ" ដូចជា "សមត្ថភាពការពារក្រោមសមុទ្រ បច្ចេកវិទ្យា AI  បច្ចេកវិទ្យាកង់ទិច និងសម្ភារៈសង្គ្រាមលឿនជាងសំឡេង"។ នៅពេលសួរថាតើរដ្ឋមន្ត្រីបានដាក់ពាក្យស្នើសុំជាផ្លូវការដើម្បីក្លាយជាភាគីនៃកិច្ចព្រមព្រៀងAUKUS ដែរឬទេ រដ្ឋមន្ត្រីការពារជាតិលោកស្រី Anita Anand បានបដិសេធមិនផ្តល់ចម្លើយផ្ទាល់ទេជំនួសមកវិញដោយនិយាយថា«ទីក្រុង Ottawa មានចំណាប់អារម្មណ៍យ៉ាងខ្លាំងក្នុងការបន្តកិច្ចសហប្រតិបត្តិការលើ AI, quantum computing និងបច្ចេកវិទ្យាទំនើបផ្សេងទៀតជាមួយនឹងវិស័យការពារជាតិដែលទំនាក់ទំនង​ជាមួយ​សម្ព័ន្ធមិត្ត​ជិតស្និទ្ធ​បំផុត​របស់​យើង​»​។ លោកស្រីបានបន្ថែមថា "ទំនាក់ទំនងរបស់យើងជាមួយសម្ព័ន្ធមិត្ត Five Eyes របស់យើងមានភាពរឹងមាំ ហើយពិតណាស់យើងនៅតែចាប់អារម្មណ៍ក្នុងការបន្តកិច្ចសហប្រតិបត្តិការនៅក្នុងប្រព័ន្ធAI និងការខិតខំប្រឹងប្រែងច្នៃប្រឌិតផ្សេងទៀតជាមួយសម្ព័ន្ធមិត្តរបស់យើង" ដោយសំដៅ​ទៅ​លើ​សម្ព័ន្ធភាព​ចែករំលែក​ព័ត៌មាន​សម្ងាត់​រវាង​អូស្ត្រាលី កាណាដា នូវែលសេឡង់ ចក្រភពអង់គ្លេស និង​សហរដ្ឋអាមេរិក។

2. ទួរគីស្នើសុំធ្វើជាម្ចាស់ផ្ទះសម្រុះសម្រួលកិច្ចចរចាសម្រាប់ស៊ូដង់

យោងតាមសារព័ត៌មាន RT ចុះផ្សាយថ្ងៃទី៩ ខែឧសភាបានអោយដឹងថា លោកប្រធានាធិបតី Erdogan និយាយថាទីក្រុងអង់ការ៉ាបានត្រៀមខ្លួនជាស្រេចដើម្បីជួយក្នុងកិច្ចពិភាក្សា ប្រសិនបើគូប្រជែងយោធាទាំងពីរយល់ព្រមចាប់ផ្តើមការចរចាដ៏ទូលំទូលាយ។ លោកប្រធានាធិបតី Recep Tayyip Erdogan បាននិយាយកាលពីថ្ងៃអង្គារថាទួរគី"ត្រៀមខ្លួនរួចជាស្រេចដើម្បីធ្វើជាម្ចាស់ផ្ទះកិច្ចចរចា"សម្រាប់ប្រទេសស៊ូដង់ ប្រសិនបើការសម្រេចចិត្តមួយត្រូវបានធ្វើឡើងដោយភាគីសង្រ្គាមទាំងពីរដើម្បីចាប់ផ្តើមការចរចាដ៏ទូលំទូលាយ។ នៅក្នុងការសន្ទនាតាមទូរស័ព្ទជាមួយប្រធានក្រុមប្រឹក្សាអធិបតេយ្យរបស់ប្រទេសស៊ូដង់ លោកឧត្តមសេនីយ Abdel Fattah al-Burhan លោក Erdogan "បានសម្តែងការសោកសៅ និងក្តីបារម្ភរបស់លោក" ចំពោះការកើនឡើងនៃចំនួនអ្នកស្លាប់ និងរបួសនៅក្នុងជម្លោះប្រដាប់អាវុធដែលបានផ្ទុះឡើងនៅពាក់កណ្តាលខែមេសា នេះបើយោងតាមសេចក្តីថ្លែងការណ៍ពីនាយកដ្ឋានទំនាក់ទំនងរបស់ទួរគីលើកឡើង។ សេចក្តីថ្លែងការណ៍បាននិយាយថាលោកក៏បានថ្លែងទៅកាន់កិច្ចខិតខំប្រឹងប្រែងដើម្បីធានាសុវត្ថិភាពរបស់ពលរដ្ឋទួរគីនៅក្នុងប្រទេសស៊ូដង់ និងជម្លៀសពួកគេចេញពីប្រទេសផងដែរ។ ទីក្រុងអង់ការ៉ាក៏នឹងបន្តកិច្ចខិតខំប្រឹងប្រែងរបស់ខ្លួន“ក្នុងការទំនាក់ទំនងជាមួយអង្គការសហប្រជាជាតិ ដើម្បីធានាថាតម្រូវការមនុស្សធម៌បន្ទាន់សម្រាប់ប្រជាជនស៊ូដង់ត្រូវបានបំពេញ”។ ខណៈពេលដែលកិច្ចចរចាបទឈប់បាញ់គ្នារវាងគូប្រជែងយោធាទាំងពីរបានចាប់ផ្តើមកាលពីថ្ងៃសៅរ៍នៅទីក្រុងឆ្នេរសមុទ្រ Jeddah របស់ប្រទេសអារ៉ាប៊ីសាអូឌីត ដែលគាំទ្រដោយទីក្រុងវ៉ាស៊ីនតោន អ្នកការទូតអារ៉ាប៊ីសាអូឌីតបានប្រាប់សារព័ត៌មាន AFP កាលពីថ្ងៃចន្ទថា កិច្ចពិភាក្សាមិនបាននាំមកនូវ "លទ្ធផលដំណើរការទៅមុខសំខាន់ៗច្រើនទេ" ។ ការប្រយុទ្ធគ្នាដ៏ខ្លាំងក្លាដែលបានផ្ទុះឡើងដោយសារការតស៊ូអំណាចរវាងឧត្តមសេនីយ៍នៃកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័ស (RSF) បានសម្លាប់មនុស្សយ៉ាងហោចណាស់ 550 នាក់ និងប្រហែល 5,000 នាក់បានរងរបួសចាប់តាំងពីថ្ងៃទី 15 ខែមេសាមកយោងទៅតាមក្រសួងសុខាភិបាល។ ទីភ្នាក់ងារជនភៀសខ្លួនរបស់អង្គការសហប្រជាជាតិកំពុងស្វែងរកប្រាក់ចំនួន 445 លានដុល្លា ដើម្បីផ្តល់ជំនួយជាបន្ទាន់សម្រាប់ជនភៀសខ្លួន និងអ្នកធ្វើមាតុភូមិនិវត្តពីស៊ូដង់ប្រមាណ 860,000 នាក់ដែលឆ្លងកាត់ប្រទេសឆាដ ស៊ូដង់ខាងត្បូង អេហ្ស៊ីប អេត្យូពី និងសាធារណរដ្ឋអាហ្វ្រិកកណ្តាល។ លោក Erdogan ដែលកំពុងស្វែងរកអាណត្តិទីបីជាប្រធានាធិបតីនៅក្នុងការបោះឆ្នោតថ្ងៃទី 14 ខែឧសភាបានព្យាយាមដាក់ទួរគីជាអ្នកសម្រុះសម្រួលក្នុងជម្លោះដទៃ ដូចជារួមទាំងវិបត្តិរុស្ស៊ី - អ៊ុយក្រែនផងដែរ។

3. អធិការបតីអាល្លឺម៉ង់ ជំទាស់នឹងក្បួនដង្ហែជ័យជំនះ WWII នៅទីក្រុងមូស្គូ

យោងតាមសារព័ត៌មាន RT ចុះផ្សាយថ្ងៃទី៩ ខែឧសភាបានអោយដឹងថាអ្នកស្នងតំណែងមុនរបស់លោក Olaf Scholz គឺលោកស្រី Angela Merkel ធ្លាប់បានចូលរួមពិធីរំលឹកវិញ្ញាណក្ខន្ធនៅរដ្ឋធានីរុស្ស៊ី។ អធិការបតីអាល្លឺម៉ង់លោក Olaf Scholz បានអះអាងថា ក្បួនដង្ហែរទិវាជ័យជំនះតាមប្រពៃណីនៅឆ្នាំនេះនៅទីក្រុងមូស្គូ ត្រូវបានប្រើប្រាស់ដោយប្រធានាធិបតីរុស្ស៊ី លោក វ្ល៉ាឌីមៀ ពូទីន ដើម្បីបង្ហាញអំណាចយោធារបស់លោក។ មេដឹកនាំអាល្លឺម៉ង់ក៏បានថ្កោលទោសចំពោះសកម្មភាពរបស់វិមានក្រឹមឡាំងនៅអ៊ុយក្រែន ដោយជំរុញឱ្យEUគាំទ្រទីក្រុងគៀវឱ្យបានយូរតាមដែលចាំបាច់។ នៅក្នុងសុន្ទរកថាទៅកាន់សភាអឺរ៉ុបដែលប្រារព្ធទិវាអឺរ៉ុបកាលពីថ្ងៃអង្គារ លោក Scholz បាននិយាយថា "ចម្ងាយ 2,200 គីឡូម៉ែត្រទៅភាគឦសាននៃទីក្រុង Strasbourg លោកពូទីនកំពុងដង្ហែទាហាន រថក្រោះ និងមីស៊ីលរបស់លោក" ។ អធិការបតីអាល្លឺម៉ង់បាននិយាយថា ទោះជាយ៉ាងនេះក្តី សហភាពអឺរ៉ុប មិនគួរណាត្រូវភិតភ័យដោយ "ឥរិយាបថ" របស់មេដឹកនាំរុស្ស៊ីបែបនោះទេ ។ លោក​បាន​អំពាវនាវ​ឲ្យ​រដ្ឋ​ជា​សមាជិកអោយ«​រក្សា​ស្ថិរភាព​ក្នុង​ការ​គាំទ្រ​របស់​យើង​សម្រាប់​អ៊ុយក្រែន​ឲ្យ​បាន​យូរ​តាមទៅ​ការ​ចាំបាច់»។ លោក Scholz ក៏បាននិយាយផងដែរនៅក្នុងការពេញចិត្តទៅលើកិច្ចសហប្រតិបត្តិការកាន់តែជិតស្និទ្ធក្នុងចំណោមរដ្ឋសមាជិកសហភាពអឺរ៉ុបលើវិស័យការពារជាតិ និងការផលិតអាវុធ។ អធិការបតីបានសង្កត់ធ្ងន់លើសារៈសំខាន់នៃសម្ព័ន្ធភាពអឺរ៉ុបជាមួយសហរដ្ឋអាមេរិក ក៏ដូចជាការពង្រីកទៅកាន់ទិសខាងកើតរបស់សហភាពអឺរ៉ុប ជាមួយនឹងការអាចចូលរួមជាសក្តានុពលរបស់រដ្ឋបាល់កង់ខាងលិច អ៊ុយក្រែន ម៉ុលដាវី និងហ្សកហ្ស៊ី។ នៅព្រឹកថ្ងៃអង្គារ ក្បួនព្យុហយាត្រាយោធារំលឹកខួបលើកទី78 នៃជ័យជំនះរបស់សហភាពសូវៀតលើពួកណាស៊ីអាល្លឺម៉ង់ត្រូវបានប្រារព្ធឡើងនៅលើទីលានក្រហមក្នុងទីក្រុងម៉ូស្គូ។ លោកពូទីន​បាន​​អះអាង​នៅក្នុងព្រឹត្តិការណ៍នោះថាអាមេរិក និង​សម្ព័ន្ធមិត្តរបស់ពួកគេ​កំពុង​ស្វែងរកវិធី​​បំផ្លាញ​រុស្ស៊ីហើយ។ លោកពូទីនបានសន្និដ្ឋានថា "វាហាក់ដូចជាពួកគេបានភ្លេចនូវអ្វីដែលមហិច្ឆតាឆ្កួត ៗ របស់ពួកណាស៊ីបានផ្តល់អោយ" ។ ក្នុងឆ្នាំ 2010 អ្នកស្នងតំណែងមុនរបស់លោក Scholzគឺអ្នកស្រី Angela Merkel បានចូលរួមក្នុងក្បួនដង្ហែរទិវាជ័យជំនះស្រដៀងគ្នានេះនៅទីក្រុងម៉ូស្គូនៅថ្ងៃទី 9 ខែឧសភា។ គណៈប្រតិភូអាល្លឺម៉ង់ដែលដឹកនាំដោយអធិការបតីលោក Gerhardt Schroeder ក៏មានវត្តមាននៅក្នុងក្បួនដង្ហែរយោធាឆ្នាំ 2005 នៅលើទីលានក្រហមនោះដែរ។

4. សហភាពអឺរ៉ុបនឹងចាត់វិធានការដាក់ទណ្ឌកម្មប្រឆាំងរុស្ស៊ីជាសកល

យោងតាមសារព័ត៌មាន RT ចុះផ្សាយថ្ងៃទី៩ ខែឧសភាបានអោយដឹងថាសារព័ត៌មាន Bloomberg រាយការណ៍ថា គោលដៅនឹងដាក់លើរួមបញ្ចូលក្រុមហ៊ុននៅក្នុងប្រទេសចិន ហុងកុង អារ៉ាប់រួម និងអាស៊ីកណ្តាល។ Bloomberg បានរាយការណ៍កាលពីថ្ងៃចន្ទដោយដកស្រង់ពីឯកសារថា គណៈកម្មការអឺរ៉ុបបានស្នើឱ្យពង្រីកការរឹតបន្តឹងពាណិជ្ជកម្មប្រឆាំងរុស្ស៊ីចំពោះក្រុមហ៊ុននៅក្នុងប្រទេសជាច្រើនដែលធ្វើអាជីវកម្មជាមួយទីក្រុងម៉ូស្គូ រួមទាំងប្រទេសចិន និងអារ៉ាប់រួម។ វិធានការនេះតាមសេចក្តីរាយការណ៍នឹងកំណត់គោលដៅលើអាជីវកម្មប្រហែល 35 នៅចិនដីគោក និងហុងកុង រួមជាមួយនឹងក្រុមហ៊ុននៅអ៊ូសបេគីស្ថាន អាមេនី និងអារ៉ាប់រួមសម្រាប់ការចោទប្រកាន់ថាបានផ្តល់ការគាំទ្រដល់ប្រព័ន្ធយោធាឧស្សាហកម្មរបស់រុស្ស៊ី។ សាខាប្រតិបត្តិការរបស់ប្លុកនេះបានអំពាវនាវឱ្យមាន "ការរឹតបន្តឹងលើការនាំចេញ ទាក់ទងនឹងទំនិញ និងបច្ចេកវិទ្យាប្រើប្រាស់បានពីរមុខ ក៏ដូចជាទំនិញ និងបច្ចេកវិទ្យា ដែលអាចរួមចំណែកដល់ការលើកកម្ពស់បច្ចេកវិទ្យានៃវិស័យការពារជាតិ និងសន្តិសុខរបស់រុស្ស៊ី"។ បញ្ជីរាយនាមនេះ រួមមានក្រុមហ៊ុនអ៊ីរ៉ង់មួយចំនួន ដែលពីមុនត្រូវបានកំណត់គោលដៅក្នុងការដាក់ទណ្ឌកម្មដោយសហភាពអឺរ៉ុបពីការចោទប្រកាន់បានផ្គត់ផ្គង់ដ្រូនដល់ទីក្រុងមូស្គូ ក៏ដូចជាក្រុមហ៊ុនរុស្ស៊ីរាប់រយផងដែរ។ សមាជិកសភាមកពីរដ្ឋសមាជិកទាំង27របស់EUគ្រោងនឹងពិភាក្សាអំពីអ្វីដែលត្រូវបានមើលឃើញថាជាកញ្ចប់ទី 11 របស់ប្លុកនៃទណ្ឌកម្មប្រឆាំងរុស្ស៊ីនៅថ្ងៃទី 10 ខែឧសភា។  កាលពីដើមសប្តាហ៍នេះ សារព័ត៌មាន Financial Times បានរាយការណ៍ថាអាជ្ញាធរសហភាពអឺរ៉ុបបានស្នើសុំរួមទាំងក្រុមហ៊ុនចិនដីគោកចំនួនពីរគឺ 3HC Semiconductors និង King-Pai Technology និងចំនួនប្រាំពីហុងកុងដែលរួមមានក្រុមហ៊ុន Sinno Electronics, Sigma Technology, Asia Pacific Links, Tordan Industry និងAlpha Trading Investments ទៅក្នុងបញ្ជីអង្គភាពដែលស្ថិតនៅក្រោមការរឹតបន្តឹងពាណិជ្ជកម្ម។ ការអត្ថាធិប្បាយលើព័ត៌មាននេះ អ្នកនាំពាក្យក្រសួងការបរទេសចិន លោក Wang Wenbin បាននិយាយថា ទីក្រុងប៉េកាំង ប្រឆាំងនឹងវិធានការទាំងឡាយណា ដែលប្រើប្រាស់ទំនាក់ទំនងចិន និងរុស្ស៊ីជាលេសសម្រាប់បំផ្លាញកិច្ចសហប្រតិបត្តិការពាណិជ្ជកម្ម។ មន្ត្រី​រូប​នេះ​បាន​ព្រមាន​ថាអាជ្ញាធរ​ចិន​នឹង​ចាត់​វិធានការ​យ៉ាង​ម៉ឺងម៉ាត់​ក្នុង​ការ​ការពារ​ផលប្រយោជន៍​ជាតិ​ប្រសិន​បើ​មាន​ការ​ដាក់​ទណ្ឌកម្ម។

5. លោកខាងលិចកំពុងបាត់បង់មាសរុស្ស៊ី

យោងតាមសារព័ត៌មាន RT ចុះផ្សាយថ្ងៃទី៩ ខែឧសភាបានអោយដឹងថាគោលដៅផ្សេងទៀតបានកាន់កាប់លើពាណិជ្ជកម្មមាសរបស់រុស្ស៊ី បន្ទាប់ពី G7 និង EU បានហាមឃាត់ការនាំចូលពីប្រទេសដែលមានទណ្ឌកម្ម។ ទីភ្នាក់ងារព័ត៌មាន Bloomberg បានរាយការណ៍កាលពីថ្ងៃអង្គារថា ប្រទេសមួយចំនួនកំពុងដណ្តើមយកដុំមាសរបស់រុស្ស៊ី បន្ទាប់ពីរដ្ឋាភិបាលលោកខាងលិចបានបិទទីផ្សាររបស់ពួកគេ ដែលជាផ្នែកនៃទណ្ឌកម្មទាក់ទងនឹងអ៊ុយក្រែនលើទីក្រុងម៉ូស្គូ។ G7, EU និង Switzerland ដែលជាមជ្ឈមណ្ឌលមាសដ៏សំខាន់ ហើយមានគោលជំហរអព្យាក្រឹត បានហាមឃាត់ការនាំចូលមាសពីរុស្ស៊ីកាលពីរដូវក្តៅមុនក្នុងចេតនាដើម្បីធ្វើឱ្យប៉ះពាល់ដល់ឧស្សាហកម្មមាសប្រមាណ 20 ពាន់លានដុល្លារបស់ប្រទេសនេះ។ មុន​ការ​ដាក់​ទណ្ឌកម្ម ទីក្រុង​ឡុងដ៍​គឺជា​គោលដៅ​កំពូល​មួយសម្រាប់​មាស​រស្ស៊ី។ Bloomberg បានសរសេរថា ឥឡូវនេះ ចាប់តាំងពីធនាគារទិញមាសធំៗដូចជា JPMorgan Chase និង HSBC Holdings បានបញ្ឈប់ការជួញដូរលោហធាតុដ៏មានតម្លៃរបស់រុស្ស៊ី អ្នកលេងតូចៗជាច្រើនរាប់ចាប់ពីក្រុមហ៊ុន Logistics រហូតដល់ឈ្មួញកណ្តាលក៏បានឈានជើងចូលមក។ ការនាំចេញពីប្រទេសដែលត្រូវបានដាក់ទណ្ឌកម្មត្រូវបានប្តូរទិសទៅកាន់ប្រទេសអារ៉ាប់រួម ហុងកុង និងទួរគីវិញ ដែលមិនបានចូលរួមក្នុងការរឹតបន្តឹងរបស់លោកខាងលិច នេះយោងទៅតាមការដកស្រង់ទិន្នន័យពីក្រុមហ៊ុនតាមដានពាណិជ្ជកម្ម Import Genius ដោយផ្អែកលើតួលេខគយរបស់រុស្ស៊ីសម្រាប់រយៈពេលប្រាំមួយខែ។ ទណ្ឌកម្មរបស់លោកខាងលិចបានរារាំងមាសរបស់រុស្ស៊ីពីទីផ្សារផ្ទាល់ខ្លួនរបស់ពួកគេ និងបានហាមប្រាមឈ្មួញក្នុងការដោះស្រាយវា។ ប៉ុន្តែ​ក្រុមហ៊ុន​ក្នុងបណ្តា​ប្រទេស​ផ្សេង​ទៀត​មិន​ត្រូវ​បាន​ហាម​ឃាត់​ពីការ​ជួញ​ដូរ​លោហៈ​ដ៏​មាន​តម្លៃ​នោះ​ទេ​ព្រោះ​គ្មាន​ការ​ដាក់​ទណ្ឌកម្ម​បន្ទាប់​បន្សំ។ UAE ដែលបានក្លាយជាមជ្ឈមណ្ឌលសម្រាប់ពាណិជ្ជកម្មលោហធាតុដ៏មានតម្លៃរវាងបូព៌ា និងលោកខាងលិច បានជំនួសចក្រភពអង់គ្លេស ដោយបានក្លាយជាគោលដៅកំពូលថ្មីសម្រាប់មាសរបស់រុស្ស៊ី ជាមួយនឹងមាសមានតម្លៃជាង500លានដុល្លាត្រូវបាននាំចេញនៅទីនោះក្នុងរយៈពេលប្រាំមួយខែរហូតដល់ខែសីហា។