ភ្នំពេញ៖ គ្រាប់បែកទម្លាក់ពីយន្តហោះ ប្រភេទAN-M66 ទម្ងន់ជិត១.០០០គីឡូក្រាម កំពុងស្ថិតក្នុងការដោះបន្សាប នៅទីកន្លែងសុវត្ថិភាព ខណៈការងារនេះ សម្រេចជោគជ័យមួយជំហាន។នេះបើយោតាមការឱ្យដឹងពីអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា។

លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានឱ្យដឹងថា នៅថ្ងៃទី២៣ ខែឧសភា ឆ្នាំ២០២២នេះ ក្រុមជំនាញគ្រាប់បែកអង្គភាពស៊ីម៉ាក់ បានដោះបន្សាបគ្រាប់បែកទម្លាក់ពីយន្តហោះប្រភេទ AN-M66 ទម្ងន់ជិត១.០០០គីឡូក្រាម ដែលបានស្រង់ពីបាតទន្លេចតុមុខកន្លងទៅ។លោកបន្តថា ការងារនេះសម្រេចជោគជ័យបានមួយជំហានហើយ ដោយបានដោះបន្សាបគីបផ្ទុះក្បាលខាងមុខ ប្រកបដោយជោគជ័យ។ 

យ៉ាងណាក៏ដោយ លោកបានបញ្ចាក់ថា ដំណើរការដោះបន្សាបគ្រាប់បែកនេះ ត្រូវបានសិក្សាពីគោលការណ៍សុវត្ថិភាព និងលក្ខណ:បច្ចេកទេស យ៉ាងល្អិនល្អន់ ខណៈគ្រាប់បែកនេះ ត្រូវដោះបន្សាបគីបផ្ទុះផ្នែកកន្ទុយមួយទៀត ដែលអាចរៀបចំកាត់បន្សាបក្នុងពេលឆាប់ៗនាមុខនេះ។សូមរម្លឹកថា កាលពីពេលថ្មីៗនេះ អាជ្ញាធរបានរាយការណ៍ពីករណីប្រទះឃើញគ្រាប់បែកទម្លាក់ពីយន្តហោះ ប្រភេទ AN-M66 (ឬAN-M34) នៅពេលស្តារកាយ ល្បាប់បាតទន្លេ ស្ថិតនៅទន្លេបួនមុខ ក្បែរសណ្ឋាគារសុខាភ្នំពេញ។គ្រាប់បែកទម្លាក់ពីយន្តហោះប្រភេទAN-M66 នេះ ត្រូវបានអ្នកជំនាញអះអាងថា មានទម្ងន់ជិត១.០០០គីឡូក្រាម មានជាតិផ្ទុះជាង៥០០គីឡូក្រាម ផលិតនៅសហរដ្ឋអាមេរិក និងជាសំណល់ពីសង្គ្រាម៕