ភ្នំពេញ៖ គិតត្រឹមថ្ងៃទី៨ ខែមករា ឆ្នាំ២០២២នេះ នាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ ( ACU ) បានទទួលឯកសារប្រកាសទ្រព្យសម្បត្តិ និងបំណុល សរុបជាង១ម៉ឺនច្បាប់។
សេចក្តីជូនដំណឹងរបស់អង្គភាពប្រឆាំងអំពើពុករលួយ ( ACU ) បានឱ្យដឹងថា ចាប់តាំងពីថ្ងៃទី១ ខែមករា រហូតដល់ថ្ងៃទី៨ ខែមករា ឆ្នាំ២០២២ នាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ (អ.ប.ព.) បានទទួលឯកសារប្រកាសសរុបចំនួន ១០៧៩៥ច្បាប់ ។
អង្គភាពប្រឆាំងអំពើពុករលួយ ( ACU ) បានបញ្ជាក់ថា គ្រាន់តែនៅថ្ងៃសៅរ៍ ទី០៨ ខែមករា ឆ្នាំ២០២២ ម្សិលមិញ នាយកដ្ឋានប្រកាសទ្រព្យសម្បត្តិ និងបំណុល បានទទួលឯកសារប្រកាសទ្រព្យសម្បត្តិ និងបំណុល សរុបចំនួន ៣៩០ច្បាប់ ។
សូមបញ្ជាក់ថា ការប្រកាសទ្រព្យសម្បត្តិ និងបំណុល ត្រូវបានធ្វើឡើងតាមរបប២ឆ្នាំម្ដង គិតចាប់ពីថ្ងៃទី១ ដល់ទី៣១ ខែមករា ឆ្នាំ២០២២ ។ សមាសភាពដែលត្រូវប្រកាសទ្រព្យសម្បត្តិ និងបំណុល រួមមាន៖
-មន្រ្តីរាជការស៊ីវិលដែលមានឋានៈចាប់ពីប្រធាននាយកដ្ឋាន និងមន្រ្តីយោធា កងរាជអាវុធហត្ថ កងនគរបាលជាតិ ដែលមានឋានន្តរស័ក្កចាប់ពីវរសេនីយ៍ឯកឡើងទៅ។
-មន្រ្តីសាធារណៈដែលមានអាណត្តិជ្រើសតាំងដូចជា៖សមាជិកក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ ឃុំ-សង្កាត់,សមាជិកព្រឹទ្ធសភា សមាជិករដ្ឋសភា និងសមាជិករាជរដ្ឋាភិបាល។
- ចៅក្រមអាសនៈ ចៅក្រមអយ្យការ សារការី ក្រឡាបញ្ជី និងអាជ្ញាសាលា៕
