ភ្នំពេញ៖ តំបន់មួយចំនួននៅកម្ពុជាអាចនឹងមានធ្លាក់ភ្លៀងតិចតួច បូករួមជាមួយសីតុណ្ហភាពអប្បបរមាចុះត្រជាក់ដល់២១អង្សាសេដោយសារតែទទួលឥទ្ធិពលខ្សោយពីកម្រិតសម្ពាធទាបពីថ្ងៃទី៨-១២ ខែមីនា និងឥទ្ធិពលមធ្យមពីទ្រនុងសម្ពាធខ្ពស់(ចិន)ចាប់ពីថ្ងៃទី១៣-១៤ ខែមីនា។ យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយមបានឱ្យដឹងថា ស្ថានភាពបែបនេះនឹងធ្វើឲ្យតំបន់ទំនាបកណ្តាលមានសីតុណ្ហភាពអប្បបរមាមានពី ២២-២៤ អង្សាសេ និងសីតុណ្ហភាពអតិបរមាមានពី៣៤-៣៦អង្សាសេ ហើយអាចមានភ្លៀងក្នុងកម្រិតពីខ្សោយទៅតិចតួចដោយអន្លើ ។
ក្រសួងឱ្យដឹងបន្តថា នៅតំបន់ខ្ពង់រាបមានសីតុណ្ហភាពអប្បបរមាមានពី២១-២៣អង្សាសេ និងសីតុណ្ហភាពអតិបរមាមានពី៣៣-៣៥អង្សាសេ ហើយចាប់ពីថ្ងៃទី១៣-១៤ ខែមីនា សីតុណ្ហភាពអប្បបរមាអាចចុះត្រជាក់បន្ថែមក្នុងចន្លោះពី២-៣អង្សាសេនៅវេលាយប់ និងព្រឹក ។ ជាមួយគ្នានេះក្រសួងធនធានទឹក និងឧតុនិយមបានបញ្ជាក់ឱ្យដឹងដែរថា នៅតំបន់មាត់សមុទ្រសីតុណ្ហភាពអប្បបរមាមានពី២២-២៤អង្សាសេ និងសីតុណ្ហភាពអតិបរមាមានពី៣១-៣៤អង្សាសេ ហើយអាចមានភ្លៀងក្នុងកម្រិតពីខ្សោយទៅតិចតួចដោយអន្លើផងដែរ៕
