ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានបញ្ជាឲ្យរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុត្រូវយកចិត្តទុកដាក់ចំពោះកម្មករដែលរោងចក្រព្យួការងារ។ ការបញ្ជានេះបានធ្វើឡើងក្នុងឱកាសដែលសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានអញ្ជើញជាអធិបតីក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្សនិស្សិតវិទ្យាស្ថានខ្មែរជំនាន់ថ្មីនៅព្រឹកថ្ងៃចន្ទ ទី០៦ ខែមីនា ឆ្នាំ២០២៣នេះ ។
នៅក្នុងពិធីនេះសម្តេចតេជោនាយករដ្ឋមន្ត្រីកម្ពុជាបានមានប្រសាសន៍លើកឡើងថា ការបញ្ជាទិញសំលៀកបំពាក់ពីអឺរ៉ុប និងអាមេរិកទៅកាន់ប្រទេសនានា ដែលក្នុងនោះមានកម្ពុជាដែរគឺមានការថយចុះដោយសារតែអតិផរណាពិភពលោក។ សម្តេចតេជោ ហ៊ុន សែន បានជំរុញដល់រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុត្រូវយកចិត្តទុកដាក់ចេញអន្តរាគមន៍លើកម្មករដែលរោងចក្រព្យួរការងារ។ ជាមួយគ្នានេះសម្តេចតេជោ ហ៊ុន សែន បានមានប្រសាសន៍សូមកុំច្រឡំរឿងមិនបញ្ជាទិញច្រើនខណៈបញ្ហានេះក៏ដោយសារតែប្រទេសអ្នកបញ្ជាទិញកំពុងជួបវិបត្តិសេដ្ឋកិច្ច និងកាត់បន្ថយការចាយវាយ៕
