បន្ទាយមានជ័យ ៖ ប្រធានមន្ទីរពេទ្យបង្អែក ស្រុកកថ្មពួក ខេត្តបន្ទាយមានជ័យ បានឲ្យដឹងថា ករណីសិស្សសាលានៅវិទ្យាល័យបន្ទាយឆ្មារចំនួន១៥នាក់មានបញ្ហាសុខភាព កាលពីថ្ងៃទី១ ខែមីនា បានធូរស្រាលឡើងវិញហើយក្រោយពេលមានការយកចិត្តទុកដាក់ពីគ្រុមគ្រូពេទ្យ។ លោកវេជ្ជបណ្ឌិត ញ៉ែម ភិរម្យ ប្រធានមន្ទីរពេទ្យបង្អែក ស្រុកកថ្មពួក បានឲ្យដឹងថា តាមការសន្និដ្ឋាន គឺអាចបណ្តាលមកពីការហូបអាហារមិនទៀងពេលបរិភោគទឹកមិនស្អាតហើយសិស្សមួយចំនួនមានជំងឺប្រចាំកាយទៀតផង។
យ៉ាងណាក៏ដោយលោកបានបញ្ជាក់ថា មកទល់ពេលនេះសុខភាពរបស់សិស្សានុសិស្សទាំងអស់បានត្រលប់មកធម្មតាវិញហើយ ហើយមួយចំនួនក៏បានត្រលប់ទៅផ្ទះវិញដែរ។ សូមបញ្ជាក់ថា កាលពីព្រឹកថ្ងៃទី១ ខែមីនា ឆ្នាំ២០២៣មានករណីភ្ញាក់ផ្អើលមួយបានកើតឡើងនៅវិទ្យាល័យបន្ទាយឆ្មារក្រោយពេលមានសិស្សានុសិស្សចំនួន១៥នាក់ ដែលរៀននៅក្នុងវិទ្យាល័យនេះមានអាការឈឺក្បាល ឈឺពោះ ក្អួត និងថប់ដង្ហើម៕
