ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានជំរុញដល់រដ្ឋមន្រ្តី ក្រសួងកសិកម្មរុក្ខាប្រមាញ់ និងនេសាទឲ្យពិនិត្យខ្លឹមសារ និងកែច្បាប់ឡើងវិញពាក់ព័ន្ធការចិញ្ចឹមសត្វជិតផុតពូជ។ ថ្លែងក្នុងពិធីប្រគល់សញ្ញាបត្រជូននិស្សិតនៃវិទ្យាស្ថានបច្ចេកវិទ្យាកម្ពុជានាព្រឹកថ្ងៃទី០១ ខែមិនា ឆ្នាំ២០២៣នេះ សម្តេចតេជោ ហ៊ុន សែន បានមានប្រសាសន៍ណែនាំក្រសួងកសិកម្ម និងស្ថាប័នពាក់ព័ន្ធសូមកែច្បាប់ឡើងវិញហើយដាក់មកដើម្បីអនុម័ត និងបញ្ជូនទៅសភា។ សម្តេចតេជោនាយករដ្ឋមន្រ្តីកម្ពុជាបានលើកទឹកចិត្តឱ្យមានការចិញ្ចឹមហើយបន្តពូជ និងព្រលែងឲ្យមានសត្វក្ងោក ឬសត្វកម្រឲ្យមានច្រើនក្នុងព្រៃ។

សូមបញ្ជាក់ថា ការជំរុញនេះបានកើតឡើងក្រោយពេលមន្ត្រីរដ្ឋបាលព្រៃឈើបានចុះចាប់សត្វក្ងោកប្រមាណ២០ក្បាលរបស់ប្រជាពលរដ្ឋស្ថិតនៅស្រុកបរិបូរណ៌ ខេត្តកំពង់ឆ្នាំង យកទៅរក្សាទុកនៅសួនសត្វភ្នំតាម៉ៅ ខេត្តតាកែវ។ ការចុះចាប់នេះបង្កឱ្យមានប្រតិកម្មពីមហាជន និងក្រោយមកត្រូវបានសម្ដេចតេជោ ហ៊ុន សែន នាយករដ្ឋមន្រ្តីកម្ពុជា ចេញបញ្ជាឱ្យក្រសួងកសិកម្មរុក្ខាប្រមាញ់ និងនេសាទនាំយកសត្វក្ងោកទាំង២០ក្បាលប្រគល់ជូនទៅម្ចាស់ដើមវិញកាលពីល្ងាចថ្ងៃទី២៨ ខែកុម្ភៈ ឆ្នាំ២០២៣៕