នៅក្នុងដំណើរទស្សនកិច្ចរបស់លោកប្រធានាធិបតីអាមេរិច Joe Biden មកក្នុងប្រទេសអ៊ុយក្រែនកាលពីថ្ងៃទី២០ ខែកុម្ភៈកន្លងទៅ លោកប្រធានាធិបតីអ៊ុយក្រែន Volodymyr Zelensky បានលើកឡើងទាក់ទងអំពីប្រធានបទប្រទេសចិនផងដែរនៅក្នុងកិច្ចជំនួបនោះ។ ដោយអាស្រ័យថាប្រទេសចិនកំពុងតែមានគំរោងផ្តល់ជំនួយមកកាន់ប្រទេសរុស្ស៊ីនៅក្នុងអំឡុងពេលនៃសង្គ្រាមកំពុងបន្តនេះប្រធានាធិបតីអ៊ុុយក្រែនក៏បានធ្វើការព្រមានឡើងថាសង្គ្រាមលោកលើកទី៣ប្រហែលជានឹងអាចកើតឡើងប្រសិនបើប្រទេសចិនសំរេចចិត្តរួមដៃជាមួយប្រទេសរុស្ស៊ីដើម្បីឈ្នះនូវសង្គ្រាមនេះ។
យ៉ាងណាមិញកន្លងមកក៏សង្គេតឃើញផងដែរថាប្រទេសចិនតែងតែបដិសេធការថ្កោលទោសប្រទេសរុស្ស៊ីនៃការចូលលុកលុយប្រទេសអ៊ុយក្រែនរាប់ចាប់ពីថ្ងៃទី២៤ ខែកុម្ភៈ ឆ្នាំ២០២២មកម្ល៉េះ។ ចំណែកឯដំណើរទស្សនកិច្ចអាមេរិចមក្នុងប្រទេសអ៊ុយក្រែននេះក៏បានឆ្លុះបញ្ចំងយ៉ាងមោះមុតនៃឆន្ទៈរបស់ប្រទេសនេះក្នុងការជួយសង្គ្រោះប្រទេសអ៊ុយក្រែនផងដែរ ដរាបណាប្រទេសរុស្ស៊ីមានចិន អ៊ុយក្រែននឹងមានអាមេរិចនៅក្បែរជានិច្ច។ ខណៈដែលប្រទេសអ៊ុយក្រែនមានប្រធានាធិបតីអាមេរិចចុះមកជំនួបដោយមិនបានប្រកាសអោយដឹងមុន ប្រទេសរុស្ស៊ីឯណោះវិញក៏មានគំរោងជួបជាមួយនឹងមន្រ្តីការទូតប្រទេសចិនលោក Wang Yi ផងដែរដែលលោកនឹងធ្វើ់ដំណើរទស្សនកិច្ចទៅកាន់ទីក្រុងម៉ូស្កូនៅថ្ងៃទី២២នៅមុនខួបមួយឆ្នាំនៃសង្គ្រាម។
ជាក់ស្តែងរបាយការណ៍បង្ហាញថាប្រទេសចិនកំពុងបង្កើតភាពជាដៃគូជាមួយនឹងទីក្រុងមូស្គូក៏កំពុងស្ថិតនៅក្នុងពេលវេលាមិនសមស្របផងដែរ នៅខណៈពេលដែលអាមេរិចក៏កំពុងចោទប្រកាន់ចិននូវរឿងបាឡុងចារកម្ម។ ទោះជាយ៉ាងណាក៏ដោយក្រសួងការបរទេសចិនបានចោទប្រកាន់សហរដ្ឋអាមេរិកថាបានផ្សព្វផ្សាយ"ព័ត៌មានមិនពិត"និងចង្អុលបង្ហាញថាជាអាមេរិចខ្លួនឯងទេដែលមានពាក់ព័ន្ធនៅជម្លោះរុស្ស៊ី-អ៊ុយក្រែននេះ។ អ្នកនាំពាក្យម្នាក់បាននិយាយថា«វាជាភាគីអាមេរិកមិនមែនជាភាគីចិនទេដែលតែងតែផ្គត់ផ្គង់សព្វាវុធជាលំដាប់ទៅក្នុងសមរភូមិ។ ភាគីអាមេរិកមិនមានលក្ខណៈសម្បត្តិគ្រប់គ្រាន់ក្នុងការប្រៀនប្រដៅចិននោះឡើយហើយចិននឹងមិនទទួលយកការបង្គាប់បញ្ជារបស់សហរដ្ឋអាមេរិក ឬសូម្បីតែការដាក់សំពាធមកលើទំនាក់ទំនងចិន និងរុស្ស៊ីឡើយ»។
