ភ្នំពេញ៖ ក្រសួងសាធារណការ និងដឹកជញ្ជូនកំពុងជម្រុញការសិក្សាផ្លូវរថភ្លើងក្រោមដីក្នុងរាជធានីភ្នំពេញខណៈគម្រោងនេះ នឹងធ្វើឲ្យប្រសើរឡើងនូវការដឹកជញ្ជូនសាធារណៈ។ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តី ក្រសួងសាធារណការ និងដឹកជញ្ជូន បានថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ នាព្រឹកថ្ងៃទី១៦ ខែកុម្ភៈនេះថា ក្រសួងកំពុងជម្រុញការសិក្សាផ្លូវរថភ្លើងក្រោមដីក្នុងរាជធានីភ្នំពេញឱ្យបានលឿន។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោកឧបនាយករដ្ឋមន្រ្តី អូន ព័ន្ធមុនីរ័ត្ន បានវាយតម្លៃខ្ពស់ចំពោះការសិក្សាផ្លូវរថភ្លើងក្រោមដីក្នុងភូមិសាស្រ្តនៅរាជធានីភ្នំពេញ និងសមិទ្ធផលជាច្រើនទៀតក្នុងវិស័យសាធារណការ។
លោកឧបនាយករដ្ឋមន្រ្តី អូន ព័ន្ធមុនីរ័ត្ន បានចាត់ទុកការអនុវត្តគម្រោង និងជោគជ័យជាច្រើនកាលពីឆ្នាំ២០២២កន្លងទៅថា បានធ្វើឱ្យកម្ពុជាទទួលបានកិត្តិនាមល្បីរន្ទឺនៅលើឆាកអន្តរជាតិ។ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាធ្លាប់មានប្រសាសន៍នៅក្នុងពិធីបើកការដ្ឋានសាងសង់ស្ពានអាកាសក្នុងរាជធានីភ្នំពេញកាលពីថ្ងៃទី៣១ ខែសីហា ឆ្នាំ២០២២កន្លងទៅថា គម្រោងរថភ្លើងក្រោមដីក្នុងរាជធានីភ្នំពេញអាចនឹងចំណាយ១,៨ពាន់លានដុល្លារ ៕
