ភ្នំពេញ៖ មន្រ្តីពាក់ព័ន្ធរបស់រាជរដ្ឋាភិបាលកម្ពុជា និងមន្រ្តីរបស់ប្រទេសចិនបានពិភាក្សាគ្នាអំពីនីតិវិធីនៃការអនុវត្តគម្រោងស្តារ និងលើកកម្រិតផ្លូវជាតិលេខ៧ ពីខេត្តក្រចេះ រហូតដល់ច្រកទ្វារអន្តរជាតិ ត្រពាំងគ្រៀល ខេត្តស្ទឹងត្រែង។ ក្រសួងសាធារណការ និងដឹកជញ្ជូនបានឱ្យដឹងថា ថ្នាក់ដឹកនាំក្រសួងបានប្រជុំពិនិត្យជាមួយតំណាងភាគីក្រុមហ៊ុនចិន ជុំវិញគម្រោងស្តារ និងលើកកម្រិតផ្លូវជាតិលេខ៧ពីខេត្តក្រចេះទៅខេត្តស្ទឹងត្រែង រហូតដល់ច្រកទ្វារអន្តរជាតិត្រពាំងគ្រៀល (ព្រំប្រទល់កម្ពុជា-ឡាវ) មានប្រវែងសរុប៩៦.៦៣គីឡូម៉ែត្រ។
ក្រសួងសាធារណការ និងដឹកជញ្ជូនបានឱ្យដឹងថា មន្រ្តីពាក់ព័ន្ធបានពិភាក្សាអំពីនីតិវិធីនៃការអនុវត្តគម្រោងស្តារ និងលើកកម្រិតផ្លូវជាតិលេខ៧គិតចាប់ពីភូមិរមាត ឃុំអូរគ្រៀង ស្រុកសំបូរ ខេត្តក្រចេះ រហូតដល់ច្រកទ្វារអន្តរជាតិ ត្រពាំងគ្រៀល ខេត្តស្ទឹងត្រែង (ព្រំប្រទល់កម្ពុជា-ឡាវ) ក្រោមជំនួយឥតសំណងពីសាធារណរដ្ឋប្រជាមានិតចិន។ នាពេលកន្លងទៅ រាជរដ្ឋាភិបាលកម្ពុជាបានចាត់ទុកកំណាត់ផ្លូវជាតិលេខ៧គឺជាខ្សែផ្លូវដ៏មានសក្ដានុពលមួយតភ្ជាប់ពីរាជធានីភ្នំពេញឆ្លងកាត់ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង និងឆ្ពោះទៅតំបន់ប៉ូលសេដ្ឋកិច្ចទី៤ ស្ថិតនៅភូមិភាគឦសាន ដែលបម្រើឱ្យចរាចរណ៍សម្រាប់សកម្មភាពផ្លាស់ប្តូរសេដ្ឋកិច្ច ពាណិជ្ជកម្ម និងទេសចរណ៍៕
