ខេត្តតាកែវ៖ បុរសសង្ស័យម្នាក់ត្រូវបានសមត្ថកិច្ចនគរបាលខេត្តតាកែវឃាត់ខ្លួនក្រោយពេលធ្វើសកម្មភាពក្លែងបន្លំជាមន្រ្តីឥណទានធនាគារ ឆបោកប្រាក់ចំនួនជាង៤០០០ដុល្លារ ពីពលរដ្ឋនៅស្រុកត្រាំកក់។ អធិការដ្ឋាននគរបាលស្រុកត្រាំកក់ ខេត្តតាកែវ បានឲ្យដឹងថា នគរបាលប៉ុស្តិ៍រដ្ឋបាល ត្រពាំងធំខាងជើង បានទទួលពាក្យបណ្ដឹងពីឈ្មោះ សោម បុល ភេទស្រី អាយុ ៥១ឆ្នាំ រស់នៅភូមិសំរ៉ង ឃុំត្រពាំងធំខាងជើង ស្រុកត្រាំកក់ ខេត្តតាកែវ កាលពីថ្ងៃទី១៤ ខែកុម្ភៈ ឆ្នាំ២០២៣ ដោយបានប្ដឹងឈ្មោះ ជិន សុខជា ហៅសុផល ភេទប្រុស អាយុ៣១ឆ្នាំ មានទីលំនៅនៅភូមិហង់ហេង ឃុំបឹងត្រាញ់ខាងត្បូង ស្រុកសំរោង ខេត្តតាកែវ។

នគរបាលបានឱ្យដឹងបន្តថា នៅក្នុងពាក្យបណ្ដឹងរបស់ពលរដ្ឋគឺបានប្ដឹងជនសង្ស័យខាងលើពីបទក្លែងខ្លួនជាមន្ត្រីឥណទានធានាគារ ឆបោកប្រាក់អស់ចំនួន៤១៤០ ដុល្លារអាមេរិក កាលពីកំឡុងខែវិច្ឆិកា និងខែធ្នូ ឆ្នាំ២០២២ ។ ជនសង្ស័យត្រូវបានសមត្ថកិច្ចធ្វើការសាកសួរតាមជំនាញនៅអធិការដ្ឋាននគរបាលស្រុកត្រាំកក់ ហើយសម្រេចកសាងសំណុំរឿងដើម្បីចាត់ការបន្តតាមនីតិវិធី៕