ភ្នំពេញ៖ រាជរដ្ឋាភិបាលកម្ពុជា បានបញ្ជាដល់រដ្ឋមន្រ្តីក្រសួងសុខាភិបាល ឱ្យរៀបចំទីកន្លែងផ្ដល់សេវាព្យាបាលរបួសដល់កីឡាករ កីឡាការិនីទាំងអស់នៅកម្ពុជា ដោយមិនមានការបង់ប្រាក់នៅមន្ទីរពេទ្យជាតិតេជោសន្តិភាព។ សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានមានប្រសាសន៍ឱ្យដឹងនៅព្រឹកថ្ងៃទី១៥ ខែកុម្ភៈ ឆ្នាំ២០២៣នេះថា កន្លងមកកីឡាករ កីឡាការិនីមួយចំនួនបានរងរបួសដោយការប្រកួតពិសេសកីឡាបាល់ទាត់ និងប្រដាល់។ សម្ដេចតេជោបានលើកឡើងថា ពួកគាត់បានជួបការលំបាកក្នុងការព្យាបាលនៅតាមមន្ទីរពេទ្យរដ្ឋ និងឯកជនដោយរាប់ទាំងការលំបាកលើថវិកាព្យាបាលជាញឹកញាប់គឺភរិយារបស់សម្ដេចបានផ្តល់នូវការឧបត្ថម្ភសម្រាប់ការព្យាបាលចំពោះកីឡាករប្រដាល់មួយចំនួនផងដែរ។
សម្ដេចតេជោនាយករដ្ឋមន្រ្តីបានឱ្យដឹងបន្តថា ដោយមើលឃើញនូវការលំបាកបែបនេះទើបសម្ដេចបានពិភាក្សាជាមួយលោក ម៉ម ប៊ុនហេង និងលោកស្រី យក់ សម្បត្តិ ដើម្បីរៀបចំទីកន្លែងសម្រាប់ព្យាបាលកីឡាករ កីឡាការិនី នៅមន្ទីរពេទ្យជាតិតេជោសន្តិភាព ដែលមានចំនួនគ្រែពី១០០ទៅ២០០គ្រែ ដោយការព្យាបាលមិនតម្រូវឲ្យមានការបង់ប្រាក់ និងត្រូវមានឯកទេសគ្រប់គ្រាន់ស្របតាមស្ថានភាពរបួស។
សម្ដេចតេជោ ហ៊ុន សែន បានជំរុញដល់ក្រសួងសុខាភិបាលត្រូវរៀបចំឲ្យបានឆាប់ដែលនឹងអាចចូលរួមផងដែរ ដល់ការប្រកួតស៊ីហ្គេមនាពេលខាងមុខ។ សូមបញ្ជាក់ដែរថា កាលពីថ្ងៃទី២៥ ខែមករា ឆ្នាំ២០២៣ កម្ពុជា បានរាប់ថយក្រោយ១០០ថ្ងៃសម្រាប់ដំណើរឆ្ពោះទៅធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ។ ការរាប់ថយក្រោយ១០០ថ្ងៃនេះ ត្រូវបានរាជរដ្ឋាភិបាលកម្ពុជាចាត់ទុកថា ជាព្រឹត្តិការណ៍ដ៏អស្ចារ្យនឹងក្លាយជាការពិតសម្រាប់ប្រជាជនកម្ពុជាទូទាំងប្រទេសខណៈកម្ពុជារង់ចាំឱកាសធ្វើជាម្ចាស់ផ្ទះរៀបចំការប្រកួត កីឡាស៊ីហ្គេម-អាស៊ានប៉ារ៉ាហ្គេម អស់រយៈពេលជាង៦០ឆ្នាំមកហើយ៕
