សៀមរាប៖ ព្រលានយន្តហោះសៀមរាបអង្គរ នឹងសាកល្បងការហោះហើរតេស្តឧបករណ៍នៅខែមីនា ឆ្នាំ២០២៣ ខណៈបច្ចុប្បន្នការសាងសង់សម្រេចបានប្រមាណជា៧៥ភាគរយ នឹងត្រៀមបញ្ចប់តាមផែនការ។ លោក ហ្សៅ យូហ៊ុយ (ZOU YUHUI ) ប្រធានក្រុមហ៊ុន YUNAN AIR INVESTMENT Co.,Ltd បានឲ្យដឹងថា គិតត្រឹមថ្ងៃទី១៣ ខែកុម្ភៈ ដំណើរការសាងសង់អាកាសយានដ្ឋានអន្តរជាតិសៀមរាបអង្គរបានរួចរាល់៧៥ភាគរយ ហើយក្រុមការងារនឹងហោះហើរសាកល្បងតេស្តឧបករណ៍នៅខែមីនា ឆ្នាំ២០២៣ខាងមុខ។

លោក ជា អូន រដ្ឋលេខាធិការអាកាសចរណ៍ស៊ីវិលបានជំរុញឲ្យក្រុមហ៊ុនខិតខំពន្លឿនការសាងសង់ ដើម្បីឲ្យទាន់តាមការកំណត់ដែលទទួលការចុះចតនៅខែតុលា ឆ្នាំ២០២៣ខាងមុខ។ លោក ជា អូន បានចាត់ទុកព្រលានយន្តហោះសៀមរាបអង្គរថា ជាហេដ្ឋារចនាសម្ព័ន្ធថ្មីដែលជួយពន្លឿនចក្ខុវិស័យក្នុងការពង្រឹងនិងពង្រីកសេវាដឹកជញ្ជូនអ្នកដំណើរ និងសម្រាប់ជំរុញឲ្យមានកំណើននិងទម្រង់ចីរភាពនៃកំណើនសេដ្ឋកិច្ចកម្ពុជារយៈពេលវែង។

សូមបញ្ជាក់ថា ព្រលានយន្តហោះសៀមរាបអង្គរស្ថិតក្នុងលំដាប់4E មានផ្លូវរត់ប្រវែង៣,៦០០ម៉ែត្រ ទទឹង៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយអ្នកដំណើរជាង៨ម៉ឺនម៉ែត្រក្រឡា ដែលអាចទទួលអ្នកដំណើរប្រចាំឆ្នាំប្រមាណ៧លាននាក់ និងត្រូវបានចំណាយថវិកាសាងសង់ប្រមាណជាង៨០០លានដុល្លារអាម៉េរិក៕