តាកែវ៖ បុរសវ័យចំណាស់ម្នាក់បានបាត់បង់ជីវិតនៅមន្ទីរពេទ្យ ក្រោយពេលរងរបួសធ្ងន់ធ្ងរដោយសារតែប្រពន្ធបានវាយដោយឈើជ្រុងកាលពីវេលាម៉ោង១៩យប់ ថ្ងៃទី០៨ ខែកុម្ភៈ ឆ្នាំ២០២៣ នៅភូមិលាក់រទេះ ឃុំខ្វាវ ស្រុកសំរោង ខេត្តតាកែវ។ របាយការណ៍របស់សមត្ថកិច្ចនគរបាលខេត្តតាកែវបានឱ្យដឹងថា បុរសដែលបាត់បង់ជីវិតមានឈ្មោះ ឌឿន តារា អាយុ៥៨ឆ្នាំ ចំណែកប្រពន្ធដែលប្រើហិង្សាមានឈ្មោះ នុត ម៉ៅ អាយុ៥៣ឆ្នាំរស់នៅទីតាំងកើតហេតុខាងលើ។

សមត្ថកិច្ចបានឱ្យដឹងបន្តថា ភ្លាមៗក្រោយពេលកើតហេតុសាច់ញាតិក្រុមគ្រួសារបានបញ្ជូនអ្នករងរបួសទៅសង្រ្គោះនៅមន្ទីរពេទ្យ ប៉ុន្តែដោយសាររបួសធ្ងន់ធ្ងរពេកក៏បាត់បង់ជីវិតតែម្ដង។ បន្ទាប់មកសមត្ថកិច្ចបានឃាត់ខ្លួនជនសង្ស័យ និងដកហូតវត្ថុតាងឈើជ្រុងជារនូតគ្រែចាស់មានដែកគោលយកទៅរក្សាទុក។ បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនបញ្ជូនទៅអធិការដ្ឋានស្រុកសំរោង ខេត្តតាកែវ ដើម្បីសួរនាំ និងចាត់ការទៅតាមផ្លូវច្បាប់ ចំណែកសពត្រូវបានសាច់ញាតិយកទៅធ្វើបុណ្យតាមប្រពៃណី៕