ភ្នំពេញ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានចេញសេចក្តីប្រកាសណែនាំឱ្យទប់ស្កាត់សកម្មភាពមិនប្រក្រតីក្នុងទិវានៃក្តីស្រឡាញ់ខណៈមានយុវជនមួយចំនួនបានភ្លើតភ្លើនភ្លេចការសិក្សាបាត់បង់សេចក្តីថ្លៃថ្នូរបុគ្គល និងក្រុមគ្រួសារប្រាសចាកវប្បធម៌ និងប្រពៃណីជាតិ។ នៅក្នុងសេចក្ដីណែនាំរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានកត់សម្គាល់ថា សិស្សានុសិស្សមួយចំនួនតូចបានយល់ច្រឡំថា ថ្ងៃ១៤កុម្ភៈជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍។

លោកបានបញ្ជាក់ថា ទិវានេះពុំមែនជាប្រពៃណីរបស់ជនជាតិខ្មែរទេ ហើយយុវជនក៏ពុំគួរភ្លើតភ្លើនភ្លេចការសិក្សាបាត់បង់សេចក្តីថ្លៃថ្នូរបុគ្គល និងក្រុមគ្រួសារប្រាសចាកវប្បធម៌ និងប្រពៃណីជាតិរបស់ខ្មែរដែរ។ រដ្ឋមន្ត្រីក្រសួងអប់រំយុវជន និងកីឡាបានជំរុញដល់ដំណើរការរបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលាដោយអនុវត្តសកម្មភាព «មិត្តអប់រំមិត្ត» ព្រមទាំងត្រូវទំនាក់ទំនងជិតស្និទ្ធជាមួយមាតាបិតា ឬអ្នកអាណាព្យាបាលសិស្ស និងសហគមន៍ ដើម្បីផ្តល់ និងទទួលព័ត៌មាននានាដែលពាក់ព័ន្ធនឹងសកម្មភាពមិនប្រក្រតីឱ្យបានទាន់ពេលវេលា៕