នាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ពន្ធនៃអាជ្ញាធរជាតិអប្សរាបានកាត់ក្រីមែកឈើទាលមួយចំនួន ដែលអាចបង្កហានិភ័យខ្ពស់ដល់ភ្ញៀវទេសចរឆ្លងកាត់មកទស្សនាប្រាសាទ។ លោក យិន សុវ៉ាត ទីប្រឹក្សានៃអាជ្ញាធរជាតិអប្សរាបានថ្លែងថា ការដកកាត់ក្រីមែកឈើដែលងាប់នេះបានធ្វើឡើងជាយូរមកហើយ។ ការកាត់ដក និងកាត់ក្រីមែកឈើនេះគឺក្នុងគោលបំណងដើម្បីបង្ការ និងបញ្ចៀសគ្រោះថ្នាក់ជួយសម្រាលទម្ងន់ដើមឈើជៀសវាងបាក់ធ្លាក់ ឬដួលរលំជាយថាហេតុណាមួយបណ្តាលឱ្យប៉ះពាល់ភ្ញៀវពេលដើរឆ្លងកាត់ចេញចូលប្រាសាទ។
លោកពន្យល់ថា ការកាត់ដកនិងកាត់ក្រីមែកឈើនៅតាមទីតាំងនានាដើម្បីធានាសុវត្ថិភាពភ្ញៀវទេសចរសាធារណជនក៏ដូចជាដើម្បីលើកកម្ពស់សោភ័ណភាពនៅតាមដងផ្លូវ និងតាមបរិវេណប្រាសាទក្នុងតំបន់រមណីយដ្ឋានអង្គរ។ កំឡុងពេលអនុវត្តកិច្ចការងារនេះក្រុមការងារក៏បានរៀបចំផ្លូវវាងដើម្បីសម្រួលដល់ភ្ញៀវឆ្លងកាត់ និងបញ្ចៀសនូវគ្រោះថ្នាក់ផ្សេងៗផងដែរ។ គួរបញ្ជាក់ថា នេះជាការប្រចាំថ្ងៃរបស់អាជ្ញាធរជាតិអប្សរាដើម្បីថែរក្សាទេសភាពវប្បធម៌ក៏ដូចជាថែរក្សាបរិស្ថានក្នុងរមណីយដ្ឋានអង្គរ។ ជាមួយគ្នានោះអាជ្ញាធរជាតិអប្សរាក៏បានអំពាវនាវដល់ភ្ញៀវជាតិ និងអន្តរជាតិទាំងអស់មានការយោគយល់ អធ្យាស្រ័យ និងចូលរួមសហការដើម្បីឱ្យការអនុវត្តការងារបានរលូន និងសុវត្ថិភាពខ្ពស់ទាំងអស់គ្នា៕
