ភ្នំពេញ៖ មនុស្សសរុបចំនួន២៨នាក់បានស្លាប់ និងរងរបួសធ្ងន់-ស្រាលដោយសារករណីគ្រោះថ្នាក់ចរាចរណ៍ផ្លូវគោកទូទាំងប្រទេសនាថ្ងៃទី២៣ ខែមករា ឆ្នាំ២០២៣។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។ យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសបានឱ្យដឹងថា គ្រោះថ្នាក់ចរាចរណ៍ផ្លូវគោកទូទាំងប្រទេសកាលពីថ្ងៃទី២៣ ខែមករា បានបណ្តាលឲ្យមនុស្សស្លាប់១០នាក់ និងរបួសធ្ងន់ចំនួន១១នាក់ព្រមទាំងរបួសស្រាលចំនួន៧នាក់។

យោងតាមទិន្នន័យគ្រោះថ្នាក់ចរាចរណ៍ផ្លូវគោកបានបញ្ជាក់ថា គ្រោះថ្នាក់នេះកើតឡើងដោយសារការប៉ះទង្គិចគ្នាចំនួន១៥លើក។ គួរកត់សម្គាល់ថា នាពេលថ្មីៗនេះថ្នាក់ដឹកនាំក្រសួងមហាផ្ទៃធ្លាប់វាយតម្លៃថា ករណីគ្រោះថ្នាក់ចរាចរណ៍នៅកម្ពុជាគិតជាមធ្យមក្នុងមួយថ្ងៃមានអ្នកស្លាប់ចំនួន៥នាក់ និងរបួសប្រមាណ១៣នាក់បើធៀបឆ្នាំ២០២១ ជាមធ្យមក្នុងមួយថ្ងៃមានអ្នកស្លាប់ចំនួន៤នាក់ និងរបួសប្រមាណ១០នាក់ខណៈភាគច្រើនជាអ្នកជិះម៉ូតូ និងមិនបានពាក់មួកការពារសុវត្ថិភាព៕