ភ្នំពេញ៖ ពលរដ្ឋកម្ពុជាដែលមានជីវភាពក្រីក្រចំនួនជាង១លាននាក់នឹងត្រូវបានរាជរដ្ឋាភិបាលផ្ដល់ជូនការសិក្សាជំនាញបច្ចេកទេសវិជ្ជាជីវៈ ដើម្បីឱ្យដើរស្របតាមដំណាក់កាលសេដ្ឋកិច្ចឌីជីថល។ មានប្រសាសន៍ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជានាព្រឹកថ្ងៃទី២៣ ខែមករា ឆ្នាំ២០២៣នេះសម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានថ្លែងថា រាជរដ្ឋាភិបាលនឹងបណ្តុះបណ្តាលដល់ពលរដ្ឋកម្ពុជាប្រមាណជាង១លាន៥សែននាក់ ឱ្យបានចូលសិក្សាជំនាញបច្ចេកទេសនៅចុងឆ្នាំ២០២៣និងឆ្នាំ២០២៤ ដោយនៅអំឡុងពេលសិក្សាជំនាញបច្ចេកទេសនេះរាជរដ្ឋាភិបាលក៏នឹងផ្ដល់ជូននូវប្រាក់ឧបត្ថម្ភផងដែរ។

សម្តេចតេជោ ហ៊ុន សែន មានប្រសាសន៍លើកឡើងដែរថា កម្ពុជាមានធនធានមនុស្សតែគ្មានបច្ចេកទេសគឺមិនអាចទៅរួចទេតែប្រសិនបើមានធនធានដែលមានចំណេះជំនាញគឺងាយស្រួលចាប់យកឱកាសនៅពេលដែលរាជរដ្ឋាភិបាលកំពុងតែទាក់ទាញបណ្តាវិនិយោគិន។ សម្ដេចនាយករដ្ឋមន្រ្តីបានណែនាំដល់គណៈកម្មាធិការគោលនយោបាយសេដ្ឋកិច្ចឱ្យត្រួតពិនិត្យមើលឡើងវិញខណៈសក្តានុពលកម្ពុជាមានកម្លាំងវ័យក្មេងច្រើន ប៉ុន្តែសមត្ថភាពនៅមានកម្រិត៕