ភ្នំពេញ៖ កុមារីកម្ពុជាម្នាក់ មានអាយុ១ឆ្នាំប៉ុណ្ណោះ ត្រូវបានបញ្ជូនទៅសង្រ្គោះ និងព្យាបាលនៅមជ្ឈមណ្ឌលព្យាបាលកុមារបេះដូងជប៉ុន ដែលបញ្ហានេះ ត្រូវបានគេចាត់ទុកថា ជាករណីដ៏កម្រជួបប្រទះពីមុនមក។យោងតាមសេចក្តីរាយការណ៍ពីមជ្ឈមណ្ឌលព្យាបាលកុមារបេះដូងជប៉ុន បានឱ្យដឹងថា កុមារីដែលបានមកព្យាបាលជំងឺមហារីកថ្លើម មានឈ្មោះ ធ.ត អាយុ១ឆ្នាំ។កុមារី រូបនេះ មានដុំសាច់នៅក្នុងថ្លើម ហើយត្រូវបានរួមតូចជាបន្តបន្ទាប់ តាមរយះការព្យាបាលដោយថ្នាំគីមីប្រឆាំងមហារីក ហើយនៅក្នុងខែមីនា នាងបានទទួលការវះកាត់ ដើម្បីយកដុំសាច់ទាំងស្រុងនោះចេញ។

មជ្ឈមណ្ឌលព្យាបាលកុមារបេះដូងជប៉ុន បានឱ្យដឹងបន្តថា កាលពីថ្ងៃទី១០ ខែឧសភា កុមារី ធ.ត ត្រូវបានអនុញ្ញាតឱ្យចាកចេញពីមន្ទីរពេទ្យហើយ ប៉ុន្តែគ្រូពេទ្យ នឹងបន្តតាមដានសុខភាពរបស់នាងជាទៀងទាត់នៅមន្ទីរពេទ្យ។ តាមការបញ្ជាក់របស់មជ្ឈមណ្ឌលព្យាបាលកុមារបេះដូងជប៉ុន បានឱ្យដឹងថា ស្ថានភាពកុមារី ធ.ត នៅពេលចេញពីមន្ទីរពេទ្យពិតជាផ្ទុយស្រឡះពីស្ថានភាពដែលបានដឹកមកទទួលការព្យាបាលនៅថ្ងៃដំបូង ដែលមានតែការភិតភ័យ និងព្រួយបារម្ភ ខណៈបច្ចុប្បន្នពួកគេបានរីករាយ និងចេញពីមន្ទីរពេទ្យដោយសុវត្ថិភាព៕