ភ្នំពេញ៖ ជនជាតិចិន ចំនួន៤នាក់ ត្រូវបានកម្លាំងសមត្ថកិច្ច នៃមន្ទីរប្រឆាំងគ្រឿងញៀន ឃាត់ខ្លួននៅក្នុងប្រតិបត្តិការបង្រ្កាបទីតាំងមន្ទីរពិសោធន៍លួចលាក់ផលិត កែច្នៃគ្រឿងញៀន និងរឹបអូសសារធាតុញៀនជាង ១៤០០ គីឡូក្រាម ព្រមទាំងសារធាតុគីមីជាង ១១តោន នៅក្នុងភូមិសាស្រ្តរាជធានីភ្នំពេញ និងខេត្តកំពង់ស្ពឺ។

តាមការឱ្យដឹងពីមន្ទីរប្រឆាំងគ្រឿងញៀន នៃអគ្គស្នងការដ្ឋាន នគរបាលជាតិ បានបញ្ជាក់ថា ករណីនេះ ត្រូវបានធ្វើការស្រាវជ្រាវ អស់រយៈពេលជាង ០២ខែរួចមក លុះនៅថ្ងៃទី១៩ ខែឧសភា ឆ្នាំ២០២២ វេលាម៉ោង ១៨និង៣០នាទី ទើបសមត្ថកិច្ចបើកប្រតិបត្តិការបង្រ្កាបមន្ទីរពិសោធន៍លួចលាក់កែច្នៃផលិតសារធាតុញៀន នៅ៣ទីតាំងផ្សេងគ្នាជាបន្តបន្ទាប់។មន្ទីរប្រឆាំងគ្រឿងញៀន បានឱ្យដឹងបន្តថា ប្រតិបត្តិការទី១ ត្រូវបានធ្វើឡើងនៅចំណុចបន្ទប់លេខ៨០២ ក្នុងខុនដូ J CITY ផ្លូវលេខ ៣២២ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។

ទី២៖នៅក្នុងចំការស្វាយ ស្ថិតក្នុងភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ និងចំណុចទី៣៖ ស្ថិតនៅក្នុងចំការស្វាយ ភូមិស្រល់ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។នៅក្នុងប្រតិបត្តិការនេះដែរ សមត្ថកិច្ចបានខ្លួន ជនសង្ស័យចំនួន៤នាក់ ជនជាតិចិន (តៃវ៉ាន់) រួមមាន ៖១-ឈ្មោះ TIEN CHAN FU ភេទប្រុស អាយុ ២៨ឆ្នាំ (មេការ) ២-ឈ្មោះ KHOU PO WEN ភេទប្រុស អាយុ ២៨ឆ្នាំ (អ្នកបច្ចេកទេស ៣-ឈ្មោះ TENG KUO CHING ភេទប្រុស អាយុ ៣៩ឆ្នាំ (អ្នកបច្ចេកទេស) និងទី៤-ឈ្មោះ LIN YI CHHENG ភេទប្រុស អាយុ ៣១ឆ្នាំ (អ្នកបច្ចេកទេស)។

ជាមួយគ្នានេះ សមត្ថកិច្ចចាប់យកវត្ថុតាងមួយចំនួន រួមមាន៖ ម៉ាស៊ីន,ឧបករណ៍ សម្ភារសម្រាប់កែច្នៃ ផលិត វេចខ្ចប់មួយចំនួនធំ,សារធាតុញៀនប្រភេទ កេតាមីន ទម្ងន់ ៤០គីឡូ ៥១.៧ក្រាម ,ល្បាយសារធាតុញៀនកេតាមីន ទម្ងន់ ១៤២៥គីឡូ,ថ្នាំគ្រាប់នីមេតាហ្សេប៉ាម ទម្ងន់ ០.៩ក្រាម និងសារធាតុគីមីផ្សំ ទម្ងន់១១តោន ៥២៥គីឡូ។ ជនសង្ស័យ ព្រមទាំងវត្ថុតាង ត្រូវបានកម្លងមន្ទីរប្រឆាំងគ្រឿងញៀន កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕