ភ្នំពេញ៖ បង្គាចាក់សារធាតុគីមីជាង ៧តោន ត្រូវបានមន្រ្តីជំនាញ នៃអគ្គនាយកដ្ឋានការពារអ្នកប្រើប្រាស់កិច្ចការប្រគួតប្រជែង និងបង្រ្កាបការក្លែងបន្លំ ធ្វើការបង្រ្កាបបាន កាលពីខែមករា ដើមឆ្នាំ២០២២។

របាយការណ៍របស់អគ្គនាយកដ្ឋានការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ បានឱ្យដឹងថា តាមរយៈការប្រមូលនូវព័ត៌មានពាក់ព័ន្ធនានា តាមបណ្ដាទីផ្សារ មន្ត្រីស៊ើបអង្កេត បានស្ទាក់ចាប់នូវរថយន្តដឹកបង្គា ដែលបានចាក់បញ្ចូលនូវសារធាតុ CMC (ចាហួយ) ជាច្រើនលើកក្នុងខែមករា ដើមឆ្នាំ២០២២នេះ។ 

ប្រភពបន្តថា គិតត្រឹមខែមករា ឆ្នាំ២០២២នេះ មន្ត្រីជំនាញបានរកឃើញ និងដកហូតបាននូវបង្គា ដែលមានចាក់បញ្ចូលសារធាតុ CMC (ចាហួយ) ពីទីផ្សារ មធ្យោបាយដឹកជញ្ជូន និងមាត់ច្រកព្រំដែន សរុបបានចំនួន ៧តោន និង ៧៩២គីឡូក្រាម។

អគ្គនាយកដ្ឋានការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ បានប្ដេជ្ញាបន្តកិច្ចសហការជាមួយមន្ត្រីគយ និងរដ្ឋាករកម្ពុជា ដែលឈរជើងតាមមាត់ច្រកព្រំដែន ដើម្បីធ្វើការត្រួតពិនិត្យទៅលើបង្គា ដែលនាំចូលពីបរទេស ក្នុងគោលបំណងទប់ស្កាត់មិនឱ្យបង្គាចាក់សារធាតុ CMC (ចាហួយ) អាចចរាចរក្នុងទីផ្សារប្រទេសកម្ពុជា បានឡើយ។

អគ្គនាយកដ្ឋានការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ បានអំពាវនាវដល់អ្នកប្រកបអាជីវកម្មទាំងអស់កុំប្រព្រឹត្តផ្ទុយនឹងច្បាប់ ដែលនាំឱ្យខាតបង់ផលប្រយោជន៍សេដ្ឋកិច្ច និងសុខុមាលភាពរបស់ប្រជាពលរដ្ឋ៕