បន្ទាយមានជ័យ៖ ជនសង្ស័យប្រុស-ស្រី ចំនួន០៣នាក់ ត្រូវបានកម្លាំងនគរបាលការិយាល័យជំនាញប្រឆាំងគ្រឿងញៀននៃស្នងការដ្ឋាននគរបាលខេត្តបន្ទាយមានជ័យ និងកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលក្រុងសិរីសោភ័ណ ដឹកនាំផ្ទាល់ដោយលោកវរសេនីយ៍ឯក ធិន ស៊ិនដេត ស្នងការរងទទួលផែនការងារប្រឆាំងគ្រឿងញៀន ចុះបង្ក្រាបចាប់ឃាត់ខ្លួនជាបន្តបន្ទាប់ នៅវេលាម៉ោង១១និង១០នាទីព្រឹកថ្ងៃទី២៦ ខែមករា ឆ្នាំ២០២២ នៅចំណុចជាប់វិទ្យាល័យ អូរអំបិល ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ឯក ធិន ស៊ិនដេត បានឲ្យដឹងថា បន្ទាប់ពីទទួលបានព័ត៌មានប្រជាពលរដ្ឋរាយការណ៍ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាឲ្យលោកដឹកនាំកម្លាំងនគរបាលការិយាល័យប្រឆាំងគ្រឿងញៀន និងកម្លាំងផ្នែកប្រឆាំងគ្រឿងញៀន អធិការដ្ឋាននគរបាលក្រុងសិរីសោភ័ណ ចុះដល់ទីតាំងនិងឃាត់ខ្លួនជនសង្ស័យប្រុសស្រីចំនួន០៣នាក់ ១/- ឈ្មោះ ចាន់ សីហា ហៅកណ្តុរ ភេទប្រុស អាយុ៣៧ឆ្នាំ, ២/- ឈ្មោះ ពេជ្រ មុំ ភេទស្រី អាយុ២៧ឆ្នាំ ទាំង០២នាក់ នៅភូមិអូរអំបិល ក្រុងសិរីសោភ័ណ ខេត្តបន្ទាយមានជ័យ។ 

សម្ភារៈដកហូតបានមាន៖ ម្សៅក្រាមពណ៌ស ថ្លាំ២២កូនថង់, ថ្នាំគ្រាប់ពណ៌ក្រហម០៦គ្រាប់ និង០១ចំហៀង រួមនឹងសម្ភារៈមួយចំនួនទៀត។ លោកវរសេនីយ៍ស្នងការរងបានបញ្ជាក់ទៀតថា ដោយមានការសហការពីឈ្មោះ ចាន់ សីហា និងឈ្មោះ ពេជ្រ មុំ នៅវេលាម៉ោង០៤និង៥០នាទី រសៀលនាថ្ងៃដដែល លោកបានបន្តដឹកនាំកម្លាំងនគរបាលការិយល័យជំនាញ និងកម្លាំងនគរបាលផ្នែកប្រឆាំងគ្រឿងញៀន អធិការដ្ឋាននគរបាលក្រុងប៉ោយប៉ែត ចុះឃាត់ខ្លួនជនសង្ស័យឈ្មោះ  ញៀន សុខលាង ហៅនាង ភេទប្រុស អាយុ៤០ឆ្នាំ នៅម្តុំខាងក្រោយកាស៊ីណូហ្គ្រែន ភូមិក្បាលស្ពាន១ សង្កាត់ប៉ោយ ក្រុងប៉ោយប៉ែត។ 

ក្នុងនោះដកហូតបានវត្ថុតាង៖ ថ្នាំប្រភេទម្សៅក្រាមពណ៌សថ្លាំ ចំនួន០២កូនថង់ ទម្ងន់៣.៨២ក្រាម, និងថ្នាំគ្រាប់ពណ៌ក្រហម ចំនួន៨៦គ្រាប់, ទូរសព្ទដៃ ០១គ្រឿង, ជញ្ជីង០១, ដែកកេះជក់០៨, ដាវ០៣ដើម, កូនកាំបិតខ្លី០២ដើម, សំបកកូនថង់មួយចំនួន។

លោកវរសេនីយ៍ឯក ធិន ស៊ិនដេត បានបញ្ជាក់ទៀតថា ជនសង្ស័យទាំង០៣នាក់ និងវត្ថុតាង ត្រូវបានកម្លាំងនគរបាលជំនាញបញ្ជូនខ្លួនទៅសាលាដំបូងខេត្តបន្ទាយមានជ័យ នៅរសៀលថ្ងៃទី២៧ ខែមករា ឆ្នាំ២០២២ ដើម្បីចាត់ការតាមនីតិវិធី៕