ភ្នំពេញ៖ មន្ត្រីជំនាញការិយាល័យនគរបាលបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានី ភ្នំពេញ កំពុងស្រាវជ្រាវរកមូលហេតុនៃការ កើតឡើងអគ្គីភ័យ ០១កន្លែងក្នុងខណ្ឌ ប្ញស្សីកែវ រាជធានី ភ្នំពេញ ដែលបណ្តាលឱ្យមនុស្សស្លាប់ ០១នាក់ និងរងរបួសធ្ងន់ស្រាល ០៣នាក់ នៅក្នុងហេតុការណ៍ អគ្គីភ័យ ដែលកើតឡើងនៅវេលាម៉ោង៣និង៤៥ នាទីព្រឹក ថ្ងៃទី២៦ ខែមករា ឆ្នាំ២០២២ ស្ថិតនៅចំណុចបុរីសម្បតិ្តមាស ផ្ទះលេខ១សេ ក្រុមទី១ ភូមិ បឹង សាឡាង សង្កាត់ ឫស្សីកែវ ខណ្ឌឫស្សីកែវ រាជធានី ភ្នំពេញ។ អគ្គីភ័យនោះក៏បង្ករថយន្ត ០១គ្រឿង និងម៉ូតូ ០១គ្រឿង រងការឆាបឆេះខូចខាតទាំងស្រុង ។ 

សេចក្តីរាយការណ៍នៅកន្លែងកើតហេតុឱ្យដឹងថា ខណៈដែលអគ្គិភ័យកំពុងកើតឡើងគេឃើញលោកឧត្តមសេនីយ៍ត្រី ស៊ុម សុឃីម ស្នងការរងទទួលផែនការ ងារគ្រប់គ្រង អាវុធ ជាតិផ្ទុះ និងអគ្គិភ័យនិងលោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យនិងសង្គ្រោះ បានដឹកនាំកម្លាំង បញ្ជាផ្ទាល់នៅកន្លែងកើតហេតុ។ ក្នុងនោះបានប្រើប្រាស់ រថយន្តពន្លត់អគ្គិភ័យនៃស្នងការដ្ឋាននគរបាលរាជធានី ភ្នំពេញ ចេញអន្តរាគមន៍ ២១គ្រឿង ដែល មានការសហការពីរថយន្ត ពន្លត់អគ្គីភ័យសាលា ខណ្ឌ ប្ញស្សីកែវ ០១គ្រឿង, រថយន្តក្រុមហ៊ុន OCIC  ជ្រោយចង្វារ ០៩គ្រឿង ប្រើប្រាស់ទឹកចំនួន ៦២រថយន្ត  បានទប់ស្កាត់ទាន់ពេលវេលា មិនឱ្យអគ្គិភ័យទៅរាលដាលឆាបឆេះផ្ទះអ្នកជិតខាងចំនួន០២ខ្នងថែមទៀតនោះទេ។ គ្រោះអគ្គិភ័យនេះត្រូវបានមន្ត្រីជំនាញ អគ្គិភ័យបាញ់ទឹកពន្លត់នៅវេលាម៉ោង ៥និង៣០នាទី នាព្រឹកថ្ងៃដដែល ។ 

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គីភ័យនិងសង្គ្រោះបានប្រាប់ឱ្យដឹងថា៖ អគ្គីភ័យនេះបានចាប់ផ្តើមឆេះចេញពីក្នុងផ្ទះជាន់ក្រោមផ្ទាល់ដី ហើយបានរាលដាលទៅឆាបឆេះដល់ជាន់ទី២ ទាំងមូលខណៈដែលអ្នកនៅក្នុងផ្ទះចំនួន ០៣នាក់ សុទ្ធតែស្ត្រីកំពុងដេកលង់លក់ក៏ បណ្តាលឱ្យភ្លើងឆេះស្ត្រីរងគ្រោះទាំង ០៣នាក់ រងបួសធ្ងន់និងស្រាល។ បន្ទាប់មកមានអ្នកជិតខាងម្នាក់ឃើញបែបនោះ ក៏យកបំពង់ឧស្ម័នបាញ់ពន្លត់អគ្គីភ័យ តែត្រូវអណ្តាតភ្លើងឆាបឆេះដៃឆ្វេងបណ្តាលឱ្យរងបួសយ៉ាងទម្ងន់ផងដែរ។ ស្ត្រីរងគ្រោះទាំង ០៤នាក់ ក៏ត្រូវបានអ្នកជិតខាងជួយអន្តរាគមន៍ហើយ ដឹកបញ្ជូនទៅកាន់មន្ទីរពេទ្យ។ លុះដល់មន្ទីរពេទ្យក៏បណ្តាលឱ្យស្ត្រីរងគ្រោះម្នាក់ ដែលរងរបួសធ្ងន់បានបាត់បង់ជីវិត។ ស្ត្រីរងគ្រោះសមត្ថកិច្ចមិនទាន់ស្គាល់អត្តសញ្ញាណនៅឡើយនោះទេ។ 

លោកវរសេនីយ៍ឯក ព្រហ្ម យ៉ន ប្រាប់ឱ្យដឹងទៀតថា ម្ចាស់ផ្ទះមានឈ្មោះ ភុក ប៉ាវ ភេទប្រុស អាយុ ៦៣ឆាំ្ន ប្រកបមុខរបរម ន្រី្តរាជការ។ សំណង់ផ្ទះរងការ ខូចខាតគឺប្រភេទ ផ្ទះលែ្វងទំហំ ៤ម៉ែត្រx១៦ម៉ែត្រ ។ អគ្គីភ័យនេះមកដល់ពេលនេះមិនទាន់ដឹងមូលហេតុនៅឡើយនោះទេស្ថិតនៅក្នុងការស្រាវជ្រាវរបស់ សមត្ថកិច្ច  ៕