ភ្នំពេញ៖ ផ្លូក្រាលកៅស៊ូថ្មីមួយខ្សែ ដែលតភ្ជាប់ពីផ្លូវជាតិលេខ៤ ឆ្ពោះទៅតំបន់ភ្នំបូកគោ នឹងត្រូវធ្វើឡើងនាពេលឆាប់ៗខាងមុខ ដើម្បីបង្កភាពងាយស្រួលក្នុងការធ្វើដំណើរ ខណៈរាជរដ្ឋាភិបាល ទើបបង្កើតតំបន់ភ្នំបូកគោ ជារដ្ឋបាលក្រុងថ្មី នៃខេត្តកំពត។

ឧកញ៉ា ម៉ុង ឬទ្ឋី ប្រធានក្រុមហ៊ុន ម៉ុង ឫទ្ធី គ្រុប បានមានប្រសាសន៍ឱ្យដឹងថា ផ្លូវកៅស៊ូថ្មីប្រភេទ AC មួយខ្សែប្រវែង២៧គីឡូម៉ែត្រ នឹងកើតចេញជារូបរាងក្នុងពេលឆាប់ៗខាងមុខនេះ។
លោកបន្តថា ផ្លូវចាក់ក្រាលកៅស៊ូAC នឹងត្រូវតភ្ជាប់ពីរផ្លូវជាតិលេខ៤ ត្រង់ចំណុច PK១៥៨+២០០ ដោយឆ្លងកាត់តាមចម្ការដូងប្រេង ឆ្ពោះទៅកាន់ភ្នំបូកគោ ។

តាមការឱ្យដឹងពីក្រសួងដែនដីនគររូបនីយកម្ម និងសំណង់ បានបញ្ជាក់ថា ផ្លូវក្រាលកៅថ្មីនេះ ត្រូវឆ្លងកាត់តាមដីសម្បទានសេដ្ឋកិច្ចចម្ការដូងប្រេង ដោយក្នុងនោះអ្នកឧកញ៉ា សុខ គង់ ទទួលរ៉ាប់រងការចំណាយស្ថាបនាផ្លូវ ហើយអ្នកឧកញ៉ា ម៉ុង ឬទ្ធី ជាអ្នកជួយឈូសឆាយដើមដូងប្រេង ដើម្បីបើកផ្លូវ។

គួរកត់សម្គាល់ដែរថា ការបង្កើតផ្លូវថ្មីនេះ គឺបន្ទាប់ពីរាជរដ្ឋាភិបាលកម្ពុជា បានចេញអនុក្រឹត្យសម្រេចកាត់ឃុំចំនួន៣ ក្នុងស្រុកទឹកឈូ ខេត្តកំពត បង្កើតជាក្រុងបូកគោ កាលពីថ្ងៃទី១៦ ខែមីនា ឆ្នាំ២០២១កន្លងទៅ៕