ភ្នំពេញ ៖ រដ្ឋមន្ត្រីក្រសួងមហាផ្ទៃ បានលើកទឹកចិត្តដល់ក្រុមអ្នកពាក់ព័ន្ឋករណីក្រុមហ៊ុនណាហ្គាវើលដ៍ ឱ្យបន្តពិភាក្សាគ្នាដោយការអត់ធ្មត់ ដើម្បីឈានដល់ការបញ្ចប់វិវាទ ដែលកំពុងជាប់គាំង។
មានប្រសាសន៍ក្នុងពិធីប្រគល់រថយន្តជូនវរសេនាតូចនគរបាលការពារព្រំដែន នាព្រឹកថ្ងៃអង្គារទី២៥ ខែមករា ឆ្នាំ២០២២នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំដល់អ្នកពាក់ព័ន្ឋករណីវិវាទជាមួយក្រុមហ៊ុនណាហ្គាវើលដ៍ ឱ្យបន្តអត់ធ្មត់ និងប្រកាន់នូវជំហរសម្របសម្រួល។
សម្តេច ស ខេង បន្តថា ភាគីចំនួនបី គឺភាគីបុគ្គលិក ភាគីក្រុមហ៊ុនណាហ្គាវើលដ៍ និងភាគីអាជ្ញាធរ គួរងាកមុខរកគ្នា ទើបអាចរកដំណោះស្រាយឃើញ តែក្នុងករណីរកដំណោះស្រាយមិនឃើញ គឺភាគីពាក់ព័ន្ឋអាចប្តឹងទៅតុលាការ។
សូមបញ្ជាក់ថា ការតវ៉ារបស់បុគ្គលិក ក្រុមហ៊ុនណាហ្គាវើលដ៍ បានធ្វើឡើងអស់រយៈពេលជាច្រើនថ្ងៃមកហើយ ហើយក៏មានការសម្របសម្រួលជាច្រើនលើករួចមកហើយដែរ តែពុំមានដំណោះស្រាយនោះទេ។
ការតវ៉ានេះ បានកើតឡើងក្រោយពីក្រុមហ៊ុន បានកាត់បុគ្គលិក ចំនួន៣៦៥នាក់ ចេញពីការងារនៅអំឡុងដើមឆ្នាំ និងពាក់កណ្តាលឆ្នាំ២០២១កន្លងទៅ និងការចាប់ខ្លួនតំណាងរបស់ពួកគាត់។ក្រុមអ្នកតវ៉ាបានទាមទារឱ្យក្រុមហ៊ុនទទួលយកបុគ្គលិកទាំង៣៦៥នាក់ ចូលធ្វើការវិញ និងដោះលែងតំណាងដែលអាជ្ញាធរចាប់ខ្លួន ព្រមទាំងទាមទារលក្ខខណ្ខការងារមួយចំនួន។
ក្រុមហ៊ុនណាហ្គាវើល បានបញ្ជាក់ថា ការកាត់បន្ថយ និងបញ្ឈប់បុគ្គលិកមួយចំនួន គឺបន្ទាប់ពីក្រុមហ៊ុន បានជួបវិបត្តិដោយសារការរាតត្បាតជំងឺកូវីដ-១៩ ខណៈត្រឹមឆមាសទី១ ក្រុមហ៊ុន បានខាតបង់ថវិកាជាង៧០លានដុល្លារ៕
