ភ្នំពេញ៖ បង្គាស្រស់ផ្ទុកសារធាតុគីមី ដែលនាំចូល និងត្រៀមចែកនៅកម្ពុជា ត្រូវបានមន្រ្តីជំនាញរកឃើញបន្ថែមទៀត បន្ទាប់ពីទើបបង្រ្កាបបានចំនួនជាង៦តោន កាលពីពេលថ្មីៗកន្លងទៅនេះ។
របាយការណ៍របស់អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឱ្យដឹងនៅថ្ងៃទី២១ ខែមករា ឆ្នាំ២០២២នេះថា មន្រ្តីស៊ើបអង្គេតសាខាអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ខេត្តកំពត បានបន្តការងារត្រួតពិនិត្យគ្រឿងសមុទ្រនាំចូលតាមទិសដៅក្នុងខេត្តកំពត។
ជាលទ្ឋផលនៅថ្ងៃទី២០ ខែមករា ឆ្នាំ២០២២ មន្រ្តីបានធ្វើការត្រួតពិនិត្យរថយន្តដឹកគ្រឿង សមុទ្រចំនួន៣ ផ្ទុកបង្គាស្រស់ បង្គាក្រៀម និងមឹកក្រៀម និងឃាត់ទុកនៅមុខការិយាល័យកសិកម្មស្រុកកំពង់ត្រាច និងអធិការដ្ឋានស្រុកឈូក ហើយរកឃើញ បង្គាស្រស់ចំនួន២កេស ស្មើនឹង ២០គីឡូក្រាម មានចាក់សារធាតុចាហួយនៅក្នុងក្បាលបង្គា។
សូមបញ្ជាក់ដែរថា កាលពីថ្ងៃទី១៧ ដល់ថ្ងៃទី១៩ ខែមករា ឆ្នាំ២០២២ មន្ត្រីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានស្ទាក់ចាប់រថយន្តដឹកគ្រឿងសមុទ្រចំនួន៥គ្រឿង និងបានរកឃើញបង្គា សរុបចំនួន ៦,២៦៨គីឡូក្រាម មានចាក់បញ្ចូលគីមីទៅក្នុងក្បាលបង្គា ដែលធ្វើឱ្យប៉ះពាល់ដល់សុខភាពអ្នកប្រើប្រាស់ និងបានចាត់វិធានការភ្លាមៗ តាមរយៈការដុតកម្ទេចចោលផងដែរ៕
