ភ្នំពេញ៖ រដ្ឋមន្ត្រីក្រសួងការបរទេស វៀតណាម លោក Bui Thanh Son បានជំរុញដល់កម្ពុជា ឱ្យបន្តពិនិត្យដើម្បីអនុវត្តនូវកិច្ចព្រមព្រៀងស្តីពីការបោះបង្គោលព្រំដែនរវាងប្រទេសទាំងពីរ ឱ្យមានប្រសិទ្ធភាព ដើម្បីឈានដល់ការបញ្ចប់ ការបោះបង្គោលព្រំដែន ដែលនៅសេសសល់។

ស្ថានទូតវៀតណាម ប្រចាំកម្ពុជា បានឱ្យដឹងថា នៅក្នុងជំនួបរវាងលោក Bui Thanh Son រដ្ឋ  មន្ត្រីក្រសួងការបរទេស វៀតណាម និងលោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តី ក្រសួងការបរទេស និងសហប្រតិបត្តិការអន្តរជាតិកម្ពុជា កាលពីថ្ងៃទី២០ ខែមករា ឆ្នាំ២០២២ រដ្ឋមន្ត្រីទាំងពីរ បានឯកភាពពង្រឹងការសម្របសម្រួល និងអនុវត្តយ៉ាងសកម្មនូវកិច្ចព្រមព្រៀងរបស់ថ្នាក់ដឹកនាំជាន់ខ្ពស់ នៃប្រទេសទាំងពីរ លើការងារបោះបង្គោលព្រំដែន និងបន្តការចរចា ការបោះបង្គោលកំណត់ដែលនៅសល់១៦%ទៀត។

នៅក្នុងជំនួបដដែលនេះ លោករដ្ឋមន្ត្រី Bui Thanh Son ក៏បានស្នើដល់ភាគីកម្ពុជា បន្តសហការដោះស្រាយឯកសារផ្លូវច្បាប់ជូនប្រជាជនវៀតណាមនៅកម្ពុជា និងដោះស្រាយបញ្ហាដែលកើតឡើងផ្សេងទៀត ក្នុងស្មារតីមិត្តភាព និងកិច្ចសហប្រតិបត្តិការ។

សូមបញ្ជាក់ថា កម្ពុជា-វៀតណាម មានព្រំដែនគោក ប្រវែង ១២៧០គីឡូម៉ែត្រ ហើយភាគី ទាំងពីរ បានព្រមព្រៀងគ្នា និងសម្រេចកិច្ចការបោះបង្គោលព្រំដែន បានប្រមាណ៨៤% រួចមកហើយ៕