ភ្នំពេញ៖ អតីតសង្ឃ ពឿយ មេត្តា ត្រូវបានសមត្ថកិច្ចក្រសួងមហាផ្ទៃ ចាប់ខ្លួន និងផ្សឹក កាលពីថ្ងៃទី១៤ ខែមករា ឆ្នាំ២០២២ ពាក់ព័ន្ធបទល្មើសជាច្រើនករណី។

យោងតាមសាលាគណរាជធានីភ្នំពេញ បានឱ្យដឹងថា កាលពីថ្ងៃសុក្រ ទី១៤ ខែមករា ឆ្នាំ២០២២ គណៈសង្ឃនាយក បានសម្រេចផ្សឹកបុគ្គលឈ្មោះ ពឿយ មេត្តា ស្របតាមពុទ្ធវិន័យ និងច្បាប់រដ្ឋ ជាស្ថាពរ តាមដីកាបញ្ជាឱ្យចូលខ្លួនលេខ ០១១ អ.យ.ក ចុះថៃ្ងព្រហស្បតិ៍ ថ្ងៃទី១៣ ខែមករា ឆ្នាំ២០២២ របស់អយ្យការអមសាលាដំបូងរាជធានីភ្នំពេញ ពីបទបរិហារកេរ្ដិ៍ ជាសាធារណៈ, ប្រើប្រាស់ត្រាក្លែង, ក្លែងបន្លំឯកសារសាធារណៈ, ប្រើប្រាស់ឯកសារសាធារណៈក្លែង, ញុះញង់ ឱ្យមានការរើសអើង និងបាតុកម្ម ឱ្យចូលបង្ហាញខ្លួននៅ នាយកដ្ឋានកណ្តាលសន្តិសុខ នៃក្រសួងមហាផ្ទៃ។ 

គួរកត់សម្គាល់ថា ការចាប់ខ្លួនអតីតសង្ឃ ពឿយ មេត្តា ធ្វើឡើងក្រោយពីមានការបាតុកម្មទ្រង់ទ្រាយធំមួយមុខភូមិគ្រឹះលោកស្រីឧកញ៉ា សៀង ចាន់ហេង ពាក់ព័ន្ធដីវត្តបារមីគិរីខេមរាភ្នំបិតាធំ ឬហៅវត្តលោកយាយជំទាវ ហេង នៅប្រទេសជប៉ុន។

លោកស្រី ឧកញ៉ា សៀង ចាន់ហេង ធ្លាប់បានឱ្យដឹងថា លោកស្រី បានជាវដីមួយកន្លែង នៅប្រទេសជប៉ុន ដើម្បីកសាងវត្តព្រះពុទ្ធសាសនា ហើយប្រគេនចំពោះគណៈសង្ឃនៃព្រះរាជាណាចក្រកម្ពុជា កាលពីឆ្នាំ២០១៧ កន្លងទៅ មិនមែនសម្រាប់បុគ្គលណាមួយនោះទេ។ ប៉ុន្តែអតីតសង្ឃ ពឿយ មេត្តា បានបដិសេធ ហើយធ្វើយុទ្ធនាការទាមទារដីវត្តនៅប្រទេសជប៉ុន ដោយអះអាងថា ធ្លាប់ដឹកនាំកសាងវត្តនៅជប៉ុន អស់រយៈពេលជាច្រើនឆ្នាំ។

បន្ទាប់ពីផ្ទុះការតវ៉ារួចមក ថ្នាក់ដឹកនាំព្រះសង្ឃ បានសម្រេចប្រគល់សិទ្ធិគ្រប់គ្រង និងកាន់កាប់ដីវត្តបារមីគិរីខេមរាភ្នំបិតាធំ ឬហៅវត្តលោកយាយជំទាវហេង នៅប្រទេសជប៉ុន ដល់គណៈសង្ឃនាយក គណៈមហានិកាយនៃព្រះរាជាណាចក្រកម្ពុជា សម្រាប់ទុកជាគរុភ័ណ្ឌសង្ឃ និងសម្បត្តិតេកពុទ្ធសាសនាថេរវាទកម្ពុជា៕

អត្ថបទ៖លាង ឡា