ក្រចេះ៖ ក្មេងប្រុស អាយុ៣ឆ្នាំ ចំនួន២នាក់ ត្រូវជាបងប្អូនភ្លោះ បានស្លាប់ក្នុងហេតុការណ៍លង់ទឹកទន្លេ កាលពីព្រលប់ថ្ងៃទី១១ ខែមករា ឆ្នាំ២០២២ វេលានៅចំណុចទន្លេមេគង្គ ស្ថិតក្នុងភូមិកាកុត ឃុំសំបុក ស្រុកចិត្របុរី ខេត្តក្រចេះ ។
របាយការណ៍របស់ស្នងការដ្ឋាននគរបាលខេត្តក្រចេះ បានឱ្យដឹងថា សពក្មេងប្រុសជាបងប្អូនភ្លោះនឹងគ្នា មានឈ្មោះ ម៉ី សោទី អាយុ០៣ឆ្នាំ ជនជាតិខ្មែរ និងទី២ ឈ្មោះ ម៉ី សោទ្រី អាយុ០៣ឆ្នាំ ជនជាតិខ្មែរ និងមានឪពុកឈ្មោះ សាយ ម៉ី អាយុ៤៣ឆ្នាំ ព្រមទាំងម្ដាយឈ្មោះ វង សុខណា អាយុ២៨ឆ្នាំ ជាកសិកររស់នៅភូមិ ឃុំកើតហេតុខាងលើ។
ស្នងការដ្ឋាននគរបាលខេត្តក្រចេះ បានឱ្យដឹងបន្តថា នៅថ្ងៃកើតហេតុខាងលើ បុរសជាឱពុកបានចេញពីផ្ទះទៅលក់បន្លែ ទុកឱ្យប្រពន្ធឈ្មោះ វង សុខណា លក់ឥវ៉ាន់នៅផ្ទះដែលមានកូនប្រុសចំនួនពីរនាក់ ឈ្មោះ ម៉ី សោទី និង ឈ្មោះ ម៉ី សោទ្រី នៅផ្ទះជាមួយ តែដោយសាររវល់លក់ឥវ៉ាន់(បន្លែ) និងពុំបានចាប់អារម្មណ៍មើលកូន ស្រាប់តែកុមារទាំងពីរនាក់បងប្អូននាំគ្នាចុះទៅលេងទឹកទន្លេ នៅក្រោយផ្ទះចម្ងាយប្រហែល៥០ម៉ែត្រ លង់ស្លាប់ទាំងពីរនាក់តែម្ដង។
សពកុមារទាំងពីរ ត្រូវបានសមត្ថកិច្ចពិនិត្យ និងប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
