ភ្នំពេញ៖ មនុស្សចំនួន៥នាក់ ត្រូវបានរកឃើញឆ្លងជំងឺកូវីដ-១៩ ប្រភេទ អូមីក្រុង បន្ទាប់ពីបានពាក់ព័ន្ឋជាមួយយុវជនម្នាក់ ដែលមានទីសំណាក់ នៅ តានី ទូកមាស ខេត្តកំពត ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាលបានមានប្រសាសន៍ឱ្យដឹងថា ក្រុមអ្នកស្រាវជ្រាវបានរកឃើញមនុស្ស៥នាក់ មានវិជ្ជមានកូវីដ-១៩ ប្រភេទ អូមីក្រុង។ លោកស្រីបញ្ជាក់ថា អ្នកទាំង៥នាក់ ជាអ្នកពាក់ព័ន្ឋនឹងយុវជនម្នាក់ ដែលរស់នៅ តានីទូកមាស ខេត្តកំពត។
អ្នកនាំពាក្យ ក្រសួងសុខាភិបាល បានឱ្យដឹងបន្តថា អ្នកវិជ្ជមានកូវីដ-១៩ ប្រភេទ អូមីក្រុង ត្រូវបានរកឃើញថា ពួកគេបានចាក់វ៉ាក់សាំងបង្ការ ដោយខ្លះ ចាក់លើកទី១ និងខ្លះលើកទី២ ជាដើម ខណៈករណីនាំចូល បានចាក់មកពីក្រៅប្រទេស ផងដែរ។
សូមបញ្ជាក់ថា ក្រសួងសុខាភិបាល បានប្រកាសពីការឆ្លងចូលសហគមន៍ដំបូងនូវករណីវិជ្ជមានកូវីដ-១៩ អូមីក្រុង បន្ទាប់ពីបានរកឃើញលើយុវជនខ្មែរ អាយុ ២៣ ឆ្នាំ ស្នាក់នៅទួលសង្កែ ខណ្ឌឬស្សីកែវ ។
តាំងពីថ្ងៃទី២៧ ខែធ្នូ ឆ្នាំ២០២១ ដល់ថ្ងៃទី៥ ខែមករា ឆ្នាំ២០២២ បុរសរូបនេះ បានធ្វើដំណើរទៅជាច្រើនកន្លែង ដូចជា នៅរាជធានីភ្នំពេញ ខេត្តកំពង់ធំ ខេត្តសៀមរាប និង ទៅលេងទីតាំងមួយចំនួននៅតានីទូកមាស ខេត្តកំពត ជាមួយបងប្អូនជីដូនមួយ មកពីប្រទេសអូស្ត្រាលី។
បច្ចុប្បន្នអ្នកជំងឺកូវីដ-១៩ ប្រភេទ អូមីក្រុង ត្រូវបានដាក់សម្រាកព្យាបាល នៅមជ្ឈមណ្ឌលប្រយុទ្ឋជំងឺរបេង និងហង់សិន មណ្ឌលព្យាបាល អូឡាំពិច មណ្ឌលព្យាបាលចាក់អង្រែជាដើម៕
