បាត់ដំបង៖ កាលពីថ្ងៃទី ០៨ ខែមករា ឆ្នាំ២០២២ វេលាម៉ោង ១៤និង៣០នាទី រសៀល អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹ ម ពុទ្ធីឡា ស្នងការរងផែនការងារនគរបាលព្រហ្មណ្ឌ លោកវរសេនីយ៍  ទោ វេ គឹមចត់ អធិការនគរបាលស្រុកកំរៀង បានដឹកនាំកម្លាំងធ្វើការឃាត់ខ្លួនជនសង្ស័យឈ្មោះ សាយ រ៉ូ ភេទប្រុស អាយុ ២៤ឆ្នាំ ស្នាក់នៅភូមិ ដូង ឃុំ បឹងរាំង  ស្រុក កំរៀង ខេត្ត បាត់ដំបង ពីបទលួចមានស្ថានទម្ងន់ទោស (ដោយការគាស់ទម្លុះទម្លា យ) នាំមកកាន់អិការដ្ឋាននគរបាល ស្រុក ធ្វើការស្រាវជ្រាវ ។ មូលហេតុ ដែលឈានដល់ការឃាត់ខ្លួនស្រាវជ្រាវនេះគឺនៅថ្ងៃទី ០៨ ខែ មករា ឆ្នាំ២០២២ វេលាម៉ោងប្រមាណ ៥និង៣០នាទី ព្រឹក ជនសង្ស័យមិនស្គាល់អត្តសញ្ញាណបានធ្វើសកម្មភាពគាស់ទម្លុះទម្លាយតូបលក់ដូររបស់ជនរងគ្រោះឈ្មោះ មិញ សុធារី ភេទស្រី  អាយុ៣៧ឆ្នាំ រស់នៅ ភូមិ អូរដាលើ ឃុំ​ បឹងរាំង ស្រុក កំរៀង ខេត្តបាត់ដំបង ។ 
 យកបានទ្រព្យសម្បត្តិរួមមាន៖ ស្រាបៀរចំនួន ០៤កេស និងសម្ភារមួយចំនួនទៀត សរុបជាទឹកប្រាក់ចំនួន ៦៥០,០០០រៀល (ហុកសិបប្រាំម៉ឺនរៀល) ។ 
 នៅក្រោយកើតហេតុជនរងគ្រោះបានដាក់ពាក្យបណ្តឹងចូលមកសមត្ថកិច្ចនគរបាលស្រុកហើយឆ្លងតាមការស្រាវជ្រាវនេះសមត្ថកិច្ចកំណត់ មុខសញ្ញាបានរហូត ឈានដល់ការឃាត់ខ្លួនតែម្តង។ ក្នុងពេលឃាត់ខ្លួនសមត្ថកិច្ចដកហូតស្រាបៀរមួយចំនួនប្រគល់ឱ្យម្ចាស់វិញ ។  
នៅចំពោះមុខសមត្ថកិច្ច មុខសញ្ញារូបនេះបានឆ្លើយសារភាពថា ខ្លួនពិតជាបានធ្វើសកម្មភាពគាស់ទម្លុះទម្លាយតូបលក់ដូររបស់ជនរងគ្រោះ និងលួចយកទ្រព្យសម្បត្តិពិតប្រាកដមែន ហើយតាមការបញ្ជាក់ពីសមត្ថកិច្ចនគបាល ស្រុកកំរៀង បានឱ្យដឹងថា ជនសង្ស័យរូបនេះធ្លាប់ជាប់ពន្ធនាគារចំនួន ០៣លើករួចមក ហើយ ក្នុងអំពើចោរកម្មនេះតែរូបគេមិនបានរៀងចាលទាល់តែសោះ ។  
 នៅពេលនេះ សមត្ថកិច្ចនគរបាលស្រុក បានកសាងសំណុំរឿងបញ្ជូនមកការិយាល័យជំនាញ ដើម្បីចាត់ការបន្តតាមនីតិវិធី-ច្បាប់ ៕