ភ្នំពេញ៖ ពិធីបើកបវេសនកាលឆ្នាំសិក្សាថ្មី ២០២១-២០២២ បានធ្វើឡើងនៅទូទាំងប្រទេស នាព្រឹកថ្ងៃទី១០ ខែមករានេះ ដើម្បីធានាការផ្ដល់សេវាអប់រំប្រកបដោយគុណភាព និងបរិយាប័ន្ន ដែលផ្ដល់ឱកាសស្មើៗគ្នាដល់កុមារ និងយុវជនកម្ពុជា ទាំងក្នុងប្រព័ន្ធ និងក្រៅប្រព័ន្ធ។
ក្នុងឱកាសចូលរួមបើកបវេសនកាលឆ្នាំសិក្សាថ្មី ២០២១-២០២២ នៅវិទ្យាល័យ ហ៊ុន សែនប្រាសាទបាគង ខេត្តសៀមរាប លោកបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា រាជរដ្ឋាភិបាល កំពុងខិតខំប្រឹងប្រែងក្នុងការអភិវឌ្ឍសង្គម សេដ្ឋកិច្ចបន្តទៀត និងបានចាត់ទុកការអភិវឌ្ឍធនធានមនុស្ស គឺជាអាទិភាពទី១ រួមជាមួយនឹងការប្ដេជ្ញាឱ្យបាននូវមុំទី១ គឺការពង្រឹងគុណភាពអប់រំវិទ្យាសាស្រ្ត និងបច្ចេកវិទ្យា តាមរយៈការទាញយកផលប្រយោជន៍ ពីការអនុវត្តភាពនៅក្នុងតំបន់ និងអន្តរជាតិដើម្បីធានាបានកំណើនសេដ្ឋកិច្ចខ្ពស់ប្រកបដោយថីរភាព។
ជុំវិញថ្ងៃបើកបវេសនកាលឆ្នាំសិក្សាថ្មី ២០២១-២០២២នេះដែរ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណិ្ឌត្យសភាកម្ពុជា បានសម្តែងក្តីសង្ឃឹមថា ស្ថានភាពនេះ នឹងបន្តល្អរហូតតទៅ ដើម្បីផ្តល់ឱកាសឱ្យសិស្សានុសិស្សទទួលបាននូវការអប់រំជាប់លាប់និងមានគុណភាព។
លោកលើកឡើងថា មានតែការអប់រំប្រកបដោយគុណភាពទេ ទើបប្រទេសជាតិ អាចប្រកួតប្រជែងជាមួយជាតិដទៃបាន។
សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ក្នុងសារលិខិត ក្នុងឱកាសបើកបវេសនកាលឆ្នាំសិក្សាថ្មី ២០២១-២០២២ថា ថ្ងៃទី១០ ខែមករា ឆ្នាំ២០២២ គឺជាថ្ងៃបើកទំព័រថ្មី នៃការចាប់ផ្តើមជីវិតសិក្សាដំបូងរបស់ក្មួយៗដែលទើបនឹងដល់អាយុត្រូវចូលរៀនក្នុងឆ្នាំសិក្សាថ្មី ក្នុងគន្លងប្រក្រតីភាពថ្មី នៃវិស័យអប់រំ។
សម្តេចនាយករដ្ឋមន្រ្តីក៏បានលើកឡើងនូវចំណុចសំខាន់ៗចំនួន១៣ ដើម្បីឱ្យដំណើការឆ្នាំសិក្សាថ្មីទទួលបានលទ្ឋផលល្អប្រសើរតាមការរំពឹងទុកផងដែរ។
គួរបញ្ជាក់ថា ថ្ងៃបើកបវេសនកាលឆ្នាំសិក្សា ២០២១-២០២២ ត្រូវបានពន្យាពេលខុសពីឆ្នាំកន្លងទៅ ដោយសារតែការរីករាលដាលជំងឺកូវីដ-១៩។ប៉ុន្តែដោយសារករណីឆ្លងជំងឺកូវីដ-១៩ បានថយចុះជាបន្តបន្ទាប់ រាជរដ្ឋាភិបាលកម្ពុជា បានសម្រេចបើកប្រទេសគ្រប់វិស័យឡើងវិញ កាលពីថ្ងៃទី១ ខែវិច្ឆិកា ឆ្នាំ២០២១ ក្រោយការចាក់ស្រោចវ៉ាក់សាំងបង្ការជំងឺកូវីដ-១៩ បានអនុវត្តលើសផែនការ៕
