ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា ទើបដឹកនាំគណៈប្រតិភូវិលត្រឡប់មកដល់កម្ពុជាវិញ នាព្រឹកថ្ងៃទី៨ ខែមករា ឆ្នាំ២០២២នេះ និងបានចាត់ទុកការបំពេញទស្សនកិច្ចនៅប្រទេស មីយ៉ាន់ម៉ា ថាជាការចូលរួមចំណែកបញ្ចៀសប្រទេសនេះ ពីអំពើហឹង្សា និងសង្រ្គាមស៊ីវិល តាមរយៈបទឈប់បាញ់ព្រមទាំងវិបត្តិមនុស្សធម៍ និងការផ្តល់ជំនួយដល់អ្នកដែលត្រូវការដោយគ្មានការរើសអើង។

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍គួសបញ្ជាក់បែបនេះបន្ទាប់ពីវិលមកដល់កម្ពុជាវិញថា អាស៊ាន និងដៃគូរ ដែលចង់ចូលរួមក៍ដូចជាមីយ៉ាន់ម៉ាខ្លួនឯងនៅមានកិច្ចការជាច្រើនដែលត្រូវធ្វើដើម្បីឱ្យការឈប់បាញ់ និងការផ្តល់ជំនួយអនុវត្តទៅបានប្រកបដោយប្រសិទ្ធភាព។

ជាមួយគ្នានេះ សម្តេចតេជោ បានលើកឡើងថា អ្នកដែលប្រឆាំងជាមួយនិងបទឈប់បាញ់មានន័យថា អ្នកចង់ឱ្យមនុស្សស្លាប់ និងរបួសដោយសារសង្រ្គាម។ អ្នកដែលប្រឆាំងជាមួយនិងការផ្តល់ជំនួយ មានន័យថា អ្នកចង់ឱ្យមនុស្សស្លាប់ដោយអត់បាយ អត់ថ្នាំពេទ្យ និងអត់វ៉ាក់សាំងចាក់ការពារជំងឺរាតត្បាតកូវីដ-១៩។

សូមបញ្ជាក់ថា នៅក្នុងជំនួបជាមួយនាយឧត្តមសេនីយ៍ជាន់ខ្ពស់ មីន អោង ឡាំង នាយករដ្ឋមន្រ្តីប្រទេសមីយ៉ាន់ម៉ា នាថ្ងៃទី៧ ខែមករា ឆ្នាំ២០២២ សម្តេចតេជោ ហ៊ុន សែន ប្រធានអាស៊ាន បានចែកលែកអំពីភាពជោគជ័យ នៃគោលនយោបាយឈ្នះ-ឈ្នះ របស់កម្ពុជា ដែលសម្រេចបាននូវការផ្សះផ្សាជាតិ សន្តិភាពយូរអង្វែង ស្ថិរភាព ការអភិវឌ្ឍ និងវិបុលភាព។ 

សម្ដេចតេជោ ក៏បានសង្កត់ធ្ងន់ថា តាមបទពិសោធន៍ និងមេរៀនដែលកម្ពុជាទទួលបានពីដំណើរការសន្តិភាព, សន្តិភាពពេញលេញ និងការបង្រួបបង្រួមជាតិ មិនអាចសម្រេចបានទេ ប្រសិនបើគ្មានការចូលរួម និងការព្រម ព្រៀងគ្នាពីគ្រប់ភាគីពាក់ព័ន្ធទាំងអស់៕

អត្ថបទ៖លាង ឡា