ភ្នំពេញ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក បានដាក់ឱ្យប្រើប្រាស់គ្រុបតេឡេក្រាមជាផ្លូវការ "សុវត្ថិភាពចរាចរណ៍យើង OUR ROAD SAFETY" ដើម្បីផ្តល់ព័ត៌មានអំពីស្ថានភាពចរាចរណ៍ផ្លូវគោក ទាន់ហេតុការណ៍ តាមអនុសាសន៍ណែនាំរបស់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា។

គណៈកម្មាធិការជាតិសុវត្ថិភាពចរាចរណ៍ផ្លូវគោក បានឱ្យដឹងថា គ្រុបតេឡេក្រាម "សុវត្ថិភាពចរាចរណ៍យើង OUR ROAD SAFETY" ត្រូវបានអនុញ្ញាតដល់សាធារណជនគ្រប់រូបប្រើប្រាស់ដោយសេរី ដើម្បីផ្តល់ព័ត៌មានអំពីស្ថានភាពចរាចរណ៍ផ្លូវគោកទាន់ហេតុការណ៍ បន្ថែមលើបណ្ដាញសង្គម កម្មវិធីផ្តល់ព័ត៌មាននានា ដែលគណៈកម្មាធិការជាតិសុវត្ថិភាពចរាចរណ៍ផ្លូវគោក កំពុងទំនាក់ទំនងជាមួយសាធារណជន សំដៅបង្ការទប់ស្កាត់កាត់បន្ថយ គ្រោះថ្នាក់ និងបង្ការទប់ស្កាត់អំពើល្មើសច្បាប់ស្តីពីចរាចរណ៍ផ្លូវគោក ដែលមាននៅលើផ្លូវថ្នល់។

ការផ្ដល់ព័ត៌មានដ៍មានសារសំខាន់នេះ ត្រូវបានគណៈកម្មាធិការជាតិសុវត្ថិភាពចរាចរណ៍ផ្លូវគោក ណែនាំនូវលក្ខណ្ឌដូចជា៖
១. សូមផ្ដល់ព័ត៌មាន ទីតាំង និងពេលវេលា នៃហេតុការណ៍ពិតប្រាកដ និងច្បាស់លាស់។ 
២. សូមផ្ដល់រូបភាព ឬវីដេអូខ្លីៗ នៃហេតុការណ៍ពិតៗ ជាក់ស្ដែង។ 
៣. សូមផ្ដល់ខ្លឹមសារព័ត៌មានដោយប្រកាន់ខ្ជាប់តាមក្រមសីលធម៌។

៤. សូមកុំផ្ដល់ព័ត៌មានក្លែងក្លាយ ឬព័ត៌មានដែលមានចរិតញុះញង់ មួលបង្កាច់ បង្អួចកិត្តិយស និងសេចក្តីថ្លៃថ្នូរ របស់អ្នកដទៃ ឬប្រើពាក្យអសុរោះ ឬរូបភាពអាសអាភាស ដែលអំពើទាំងនេះនឹងត្រូវផ្ដន្ទាទោសតាមច្បាប់ជាធរមាន។ 
៥. សូមកុំផ្ដល់ព័ត៌មាន ដែលខុសពីព័ត៌មានស្តីពីសុវត្ថិភាពចរាចរណ៍ផ្លូវគោក។

សូមបញ្ជាក់ថា ក្នុងពិធីបើកការដ្ឋានគម្រោងសាងសង់ លើកកម្រិតគុណភាព ផ្លូវជាតិលេខ៤៨ កាលពីថ្ងៃទី៣ ខែមករា សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានណែនាំដល់មន្រ្តីពាក់ព័ន្ឋឱ្យបង្កើតតេលេក្រាម ដើម្បីឱ្យប្រជាពលរដ្ឋជួយថតសកម្មភាពល្មើសច្បាប់ចរាចរណ៍បញ្ជូនចូលក្នុងគ្រុបតេឡេក្រាម និងឱ្យនគរបាលអនុវត្តច្បាប់។

សម្តេចនាយករដ្ឋមន្រ្តី បានគួសបញ្ជាក់ថា ការផ្តល់យោបល់ក្នុងការបង្កើតគ្រុបតេឡេក្រាមនេះ គឺដើម្បីផ្តល់ភាពងាយស្រួលសម្រាប់ប្រជាពលរដ្ឋថត និងរាយការណ៍ ចំពោះបទល្មើសចរាចរណ៍ផ្លូវគោក ជូនដល់សមត្ថកិច្ចជំនាញ ដើម្បីអនុវត្តច្បាប់លើបុគ្គលដែលបានប្រព្រឹត្តិល្មើសនឹងច្បាប់ចរាចរណ៍ផ្លូវគោក៕

អត្ថបទ៖លាង ឡា