ភ្នំពេញ៖ ស្របពេលប្រទេសជាតិ កំពុងមានការរីកចម្រើន បានធ្វើឱ្យតម្រូវការប្រើប្រាស់យានយន្តនៅកម្ពុជា មានការកើនឡើងដែរ ប៉ុន្តែអ្នកទិញយានយន្តតពីម្ចាស់ដើមមួយចំនួននៅពុំទាន់បានកាត់ឈ្មោះផ្ទេរកម្មសិទ្ធិ ស្របតាមផ្លូវច្បាប់នៅឡើយទេ ដោយសាររកម្ចាស់ដើមមិនឃើញ។
ជុំវិញបញ្ហានេះត្រូវបានលោក សួង វ៉ាន់ហុង អគ្គនាយករងនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូនបានមានប្រសាសន៍ថា ក្រសួងបានកំណត់គោលការណ៍មួយចំនួន ដើម្បីឱ្យអ្នកទិញរថយន្តតហើយរកម្ចាស់ដើមមិនឃើញអាចកាត់ឈ្មោះផ្ទេរកម្មសិទ្ធិស្របតាមច្បាប់។
លោក សួង វ៉ាន់ហុង បានឱ្យដឹងបន្តថា គោលការណ៍ដែលត្រូវអនុវត្តរួមមាន៖ ត្រូវមកបំពេញបែបបទផ្ទេរកម្មសិទ្ឋយានជំនិៈ និងផ្តិតស្នាមមេដៃ ចំពោះមុខមន្រ្តីមានសមត្ថកិច្ចទទួលបន្ទុកផ្ទេរកម្មសិទ្ឋយានជំនិៈ ដោយភ្ជាប់នូវកិច្ចសន្យាធានាជាអ្នកកាន់កាប់ដោយមានការបញ្ជាក់ពីនគរបាល រដ្ឋបាលដែលខ្លួនរស់នៅ និងត្រូវមានលិខិតទិញលក់ត្រឹមត្រូវ ព្រមទាំងមានអត្តសញ្ញាណប័ណ្ណអ្នកកាន់កាប់ ដោយភ្ជាប់ជាមួយប័ណ្ណសម្គាល់យានយន្តច្បាប់ដើម និងពន្ឋប្រថាប់ត្រា លើការផ្ទេរកម្មសិទ្ឋយានយន្ត ព្រមទាំងវិញ្ញាបនបត្រត្រួតពិនិត្យលក្ខណៈបច្ចេកទេស។
សូមបញ្ជាក់ថា នីតិវិធីផ្ទេរកម្មសិទ្ធិ និងបង់ពន្ធប្រថាប់ត្រារួមគ្នាត្រូវបានកំណត់ដោយប្រកាសអន្តរក្រសួងរវាងក្រសួងសាធារណការ និងដឹកជញ្ជូន ក្រសួង សេដ្ឋកិច្ច និងហិរញ្ញវត្ថុ កាលពីថ្ងៃ២៧ ខែសីហា ឆ្នាំ២០២០ ហើយបានដាក់ឱ្យដំណើរការជាផ្លូវការនូវនីតិវិធីផ្ទេរកម្មសិទ្ធិ និងបង់ពន្ធប្រថាប់ត្រារួមគ្នាកាលពីថ្ងៃទី៣០ ខែកញ្ញា ឆ្នាំ២០២០៕
