ភ្នំពេញ៖ អគ្គនាយកដ្ឋានពន្ធដារ បានដាក់ចេញនូវយន្តការអនុវត្តអាករលើតម្លៃបន្ថែម លើទំនិញឌីជីថល និងសេវាឌីជីថល ដែលធ្វើពាណិជ្ជកម្មតាមប្រព័ន្ធអេឡិចត្រូនិក សម្រាប់ប្រើប្រាស់ក្នុងព្រះរាជាណាចក្រកម្ពុជា និងធ្វើការផ្គត់ផ្គង់ដោយអ្នកជាប់ពន្ធអនិវាសនជន ដែលមិនមានគ្រឹះស្ថានអចិន្ត្រៃយ៍ នៅព្រះរាជាណាចក្រកម្ពុជា។

នេះបើយោងតាមខ្លឹមសារ នៃកិច្ចប្រជុំក្នុងសិក្ខាសាលាស្តីពីការអនុវត្តអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce) តាមប្រព័ន្ធវីដេអូអនឡាញ នាព្រឹកថ្ងៃទី២២ ខែធ្នូ ឆ្នាំ២០២១នេះ ដោយមានការចូលរួមពីសភាពាណិជ្ជកម្មកម្ពុជា និងអ្នកពាក់ព័ន្ឋ។

យោងតាមខ្លឹមសារ នៃកិច្ចប្រជុំបានលើកឡើងថា វិសាលភាពនេះ គឺអនុវត្តចំពោះការផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិក ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិក ដែលធ្វើឡើងដោយអ្នកផ្គត់ផ្គង់អនិវាសនជន នៅក្រៅកម្ពុជា មកក្នុងកម្ពុជា៕

អត្ថបទ៖លាង ឡា